California, Rymphang:
Uwei u jaitbynriew Sikh uba 57 snem ka rta bad uba dei na ri India u la shah rahbor bad shah pyniap ha California ha ka jingjia kaba shyrkhei halor ka jingbakla ban pynithuh ialade ha ka Sngi Ba-ar. U Avtar Singh, u la shah rahbor ha ka por myn sngi na Tracy, kaba tang kumba shi kynta na San Jose.
Ki dur ki pyni ba u Singh u la shah tan hapoh ka kali SUV ha ki lai ngut ki briew kiba leit tur sha u habar jong kawei ka dukan ha ka por 2:30 baje janmiet. U heh katei ka thaiñ, u Patrick Withrow, u la ong ba u Singh u la pyrshang ban ïakhun pyrshah ia kitei ki briew hynrei um shym la lah namar ba ki iadon bun ngut bad ma u pat tang marwei.
Ka kurim jong u ka la pyntip ba u la jah naduh ka por 9baje mynmiet ynda ka la wan phai na ka kam bad ka la lap ia ki lai ngut ki khun jongki kiba don ha iing, khlem u kpa.
Ki pulit ki la lap ïa kawei ka metïap hajan ka Lake Berryessa, kaba jngai tang kumba 2 kynta da ka kali na katei ka jaka, ha ka Sngi Thohdieng bad hadien ki la pynithuh kyrteng ia katei ka metiap ba ka long ka jong u Singh. Ki pulit ki la iathuh ba ym shym la tip ia ka jingthmu jong ka jingpyniap hynrei ki la ong ba um dei u briew uba kitei ki kynhun runar ki thmu khnang ban pyniap. Pynban dei tang ka jingbakla jongki, namar ka jingiasyriem dur jong u bad u briew uba ki kwah ban thombor.
“Kane kam dei ka jingleh kaba shu jia ryngkhat. Ki la shah thombor hadien uwei pat u briew na ka daw kaba kyrpang bad ngi kyrmen ba kata ka daw kan paw pyrthei shen”, la ong u Withrow, katkum ka kaiphod jong ka KCRA.
“Ki nongtohkit jong ngi ki dang trei shitom ban tohkit ia kane ka mukotduma bad ban ithuh ia kiba donkti ha kane ka kam kaba shyrkhei”, u la bynrap.
U paralok jong une u nongshah pyniap, u Deep Singh, u la iathuh ba u Singh u long uba trei hok bad trei shitom bha. “La 23 snem mynta, ka kamram ba kongsan jong u ka long kum u nongshet khlieh ha ka gurudwara jong ngi, hynrei um dei tang u nongshet, u dei u briew uba nang ban trei bun tylli ki kam”, u la ong.
U Singh u dang shu long kpa ia ki lai ngut ki khun rit ‘Triplets’ jong u, kiba dang 6 bnai ka rta bad kiba la kha khlem pat dei ka por. Hynrei ka long kaba sngewsih ba ki hap ban duh noh ia u kpa jongki dang ha katei ka rta.
Kumba, napdeng ki katto katne ki nongsngewlem bad ki paralok- parajor jong u, ki la thaw ia ka rynsan nongsynñiang ‘GoFundMe’ na ka bynta jong u, kaba la batai shai shaphang jong u Singh, kum u briew uba dap da ka jingieid bad uba pynlong ia baroh ban sngew kum ki bahaiing bahasem jong u hi.
