Shillong, Rymphang 25
Ka Hynñiewtrep Integrated Territorial Organization (HITO) ka la ujor ejahar pyrshah ïa u Sunil Deodhar ha Sadar Police Station, Shillong haba ïadei ka jingkren jong u ha kawei ka jingïalang kaba u la kynnoh bad beiñ ïa ka niam Khristan.
Haba kren sha ki nongthoh khubor u Bah Donbok Dkhar President ka HITO u la ïathuh ba u Sunil Deodhar u dei u briew ba ïajan bha bad ka party Bharatiya Janata Party (BJP) u la long ruh kum u National Secretary uba dei u Co-Incharge ka BJP hapoh ka Jylla Uttar Pradesh kumjuh u dei ruh u nongïalam jong ka Rashtriya Swayamsevak Sangh (RSS) bad u dei ruh uba don bynta ba ïajan bha ban ïalap ilekshon Lok Sabha ha u snem 2014.
Shuh-shuh u la ïathuh ba Sunil u la kren beiñ ïa ka niam Khristan kaba u la ong ba u Jisu u dei u nongwei bad ka Jylla ka ai skhim tang ïa kiba la kylla niam, ban pynpaw ïa ka rukom long jong ki Khasi, uba ujor ïa ka FIR ruh u dei uba dang long niam Khasi bad ka jingujor u dkhot ka HITO uba dang long niam Khasi ka long ban pynpaw sha ka pyrthei ba kiba don ha ka niam Khasi ne niam Khristan ha Meghalaya ki long kum shipara.
“Ha ka Jylla jong ngi, ngi burom ïa baroh khoit ki niam, ngim ju beiñ ïa kano-kano ka niam” la ong u Bah Donbok. Ka HITO ka dawa ïa ki bor jong ka aiñ ban pynshitom ïa utei u briew katkum ka riti synshar ka ri bad byrngem ruh ba lada ki bor jong ka aiñ kim leh eiei, ka seng kan sa shim ïa ka sienjam ba kham tyngeh lane wat ban pynlong ïa ka jingïaid paidbah ha surok ban pynrem jur ïa utei u briew khnang ba kum kine ki jingjia kin ym jia shuh ha ki por ban sa wan.
