Islamabad, Rymphang:
Ha kane ka khubor kaba sngew phylla, la ong ba uwei u nongbishar jong ka Islamabad High Court (IHC) jong ka Pakistan, u la shakri ia katei ka kam la 5 snem kynthih, khlem ka jingtip jongno- jongno ruh halor ka jingioh kyrdan thok jong u haba iadei bad katei ka kam. Ka kynhun ki nongbishar jong ka IHC, ha kaba u la shakri ha katei ka kam aiñ haduh 5 snem ka la pynlong ia ka kyrdan aiñ jong u ban long kaba khlem jingmyntoi baroh shi katta ki jingiaid lynti jong u hapoh ka kam. Kumta ka jingthung ia u, kum u nongbishar jong ka High Court ka la long kaba khlem-akor bad kaba long be-aiñ haduh katta, hakhmat jong ka aiñ.
Katkum ki tyllong khubor ba la ioh lum, la iathuh ba ka Islamabad High Court, ka la pynmih ia ka rai kaba bniah kaba 116 sla, ha ka Sngi Nyngkong, ka 23 tarik u Rymphang, da kaba weng kam noh shi syndon ia uwei na ki nongbishar jongka, u Justice Tariq Mahmood Jahangiri, na ka kam kaba u bat baroh shi katta. U Jahangiri u la shah pynrung sha ka High Court ha u Nohprah jong u snem 2020 hynrei la pynsangeh noh ia u ha u bnai Nailur jong une u snem ba la dep hadien ba la ioh jingtip halor katei ka jingleh thok jong u.
Kane ka rai jong ka High Court ka long katkum ki sabut ba la ai da u Karachi University Registrar. Ka kashari ka la pynpaw ba ki kot pule jong u Jahangiri ki long kiba thok, kynthup ïa ka jingleh thok bad ka jingpyrshang ban lait na ka jingpynshitom.
Ka jingbishar ka la kdew ba u Jahangiri u la ïakhun ïa ka eksamin ha u snem 1988 da kaba pyndonkam da u nombar pynrung kyrteng thok. La kem ia u ba u leh thok ha ka eksamin, bad ha u snem 1989, ka skulbah ka la khang ia u haduh lai snem. U Jahangiri u la pyndonkam da ki lad thok ha ka jaka ban pdiang ia ka jingpynshitom. Ha ka snem kaba bud, u la shong eksamin biang da ka kyrteng “Tariq Jahangiri”, da kaba pyndonkam da u nombar pynrung kyrteng uba la ai ha uwei pat u samla pule uba kyrteng u Imtiaz Ahmed.
Shuh shuh, u principal jong ka Government Islamia Law College u la ïathuh ha ka ïingbishar ba “ym shym la shah pdiang satia” ha katei ka jaka pule.
Ha katei ka rai, ka iingbishar ka la kdew ba watla la ailad bunsien ia u Jahangiri ban pyni ia ki kot ki sla tynrai bad ka jubab ba la thoh, hynrei um shym la lah ban leh ia kata.
Ha ka jaka kata, u la wanrah ïa ki aplikeshon kiba pan ïa ka ben kaba pura, ka jingweng noh ïa u nongbishar ba ha khlieh duh, bad ka jingpynsangeh khlem kut por, da kaba kdew ïa ki jingbishar kiba ïadei kiba dang sahkut ha ka ïingbishar ba ha khlieh duh jong ka Sindh.
Ka bench ka la ong ba kine ki dei ki “buit pynjlan por” bad ka la pynpaw ba namar ba la pynmih ia ki sakhi da u nongujor, ka jingkit ka la leit sha u nongshah mudui ban pynshisha ia ka jingnang jingstad jong u ha ka kam ain. Ka jingbym lah jong u ban pynmih ia ki sakhi ka la pynlong ia ka jingpynkut kaba pyrshah.
