Imphal, Rymphang:
Ki bor pahara ha Tengnoupal jong ka Manipur, ki la ïoh ban bat ïa kawei ka kali, kaba kit 24 tylli ki ‘lang sohmoh, kiba dei ki symbai ba ju im ha ki jaka ba long lum, ha kaba la kynnoh ba ki la shalan beaiñ ïa ki na Myanmar sha Manipur. Ha kaba ïadei bad kane ka jingjia ki shipai ki la kem noh ïa arngut ki briew.
Kum ka jingpynsted ïa ka jingpyntreikam katkum ki jingtip ba kyrpang jong ki bor pahara, ki bor pahara ki la pynsangeh ïa kawei ka kali DI kaba saw shaka (Registration No. MN-02B-8290) ha ka 22 tarik, Rymphang katba ka dang don ha kawei ka surok ban poi sha Pallel. Hadien ba la jurip bniah, ki shipai ki la lap ïa 24 tylli ki blang khlaw kiba im kiba la buhrieh hapoh katei ka kali. Ïa kine ki mrad la ïada katkum ka aiñ ïada ïa ki mrad khlaw, bad ka jingkit beaiñ ïa ki ka long ka kam runar kaba khraw.
Ha kane ka por ba la pynlong ïa ka jingkhynra la kem noh ïa ki arngut kiba la tip kyrteng kum u Md Kalim (35) na Mayai Leikai kaba don ha Kakching distrik bad ïa u nongbud jong ka kali uba la tip kyrteng kum u Md Sabir Khan (19) na ka shnong Phundrei ha Thoubal distrik, ïa kine la rah na ka bynta ka jingtohkit. Ki heh sorkar ki la ong ba kine ki arngut kim shym la lah ban ai kino kino ki kot ki sla kiba biang ki ban sakhi halor ka jingïoh jingbit jong ki ban kit ïa kine ki mrad.
Katkum ki jingtohkit bahashwa, la lap ba ïa kine ki mrad la shalan beaiñ lyngba u pud u sam jong ka Indo-Myanmar, ka lynti kaba la nang pyndonkam bha na ka bynta ka jingkhaïi be-aiñ ïa ki mrad khlaw. Ki kynhun pahara ki la pynjur ïa ka jingpeitngor ha ki jaka khappud jong ka Manipur ha kine ki bnai ba la dep hapdeng ka jingkiew ka jingsngewkhia halor ka jingkhaïi ïa ki jait mrad ba phylla bad kiba la jan duh jait.
Ïa ki briew kiba la shah kem, ryngkat bad kine ki mrad ha ryngkat ka kali la aiti noh sha ka tnad ba dei khmih ïa ki khlaw ban leh ïa kaba donkam katkum ka aiñ. Ki bor synshar mynta ki dang wad bniah ïa ka jingïadei kaba kham ïar kaba don sha lyndet jong ka jingpyrshang ban khaïi tuh bad ki dang bishar bniah hato katei ka jingshalan mar hapoh ka ri ne sha kiwei ki ri ka pyrthei.
