Shillong, Rymphang 25
Ka Hynñiewtrep Youths Council (HYC) ka pynrem jur ïa ka jingkren laplah jong u Sunil Deodhar u ba dei u nongïalam ka Bharatiya Janata Party, kaba u la kynnoh ba Sorkar Jylla Meghalaya ka ai skul, ai surok bad ai ki skhim bapher-bapher tang ïa kiba la kylla niam Khristan. Ha ka nohphai sngi jong ka sngi Balang ka HYC ka la leit tur sha ophis ka BJP Meghalaya ban rah plakad bad pyrta ban pynrem jur ïa ka BJP bad ïa utei u nongïalam ha kajuh ka por ka la thang jem daw jem rngiew ïa u tyngshop u jong u.
U Bah Rhembor G. Saibon Secretary HYC haba kren sha ki nongthoh khubor u la ong ba kane ka jingkren jong u Sunil Deodhar ka dei ka jingkren beij, kren anna ban pynshit para jaitbynriew lyngba jong ka niam. U la kyntu ruh ïa ki paidbah ka jaitbynriew ba ki dei ban sngewthuh ïa ki briew kiba wan nabar ban pynpait pynpra para jaitbynriew, “Kine ki briew ki wan ki leit, hynrei kiba shong ban sah hangne ngi dei ma ngi, ym dei ban ailad ïa kum kine ki jait briew bad kum ka jaitbynriew ngi donkam ka jingïatylli.”
Shuh-shuh u la ong ba ka HYC ka dawa ba u dei ban pynmap paidbah namar ba kane ka jingkren jong u ka la ktah jur ïa ka jingïatylli jong ka jaitbynriew Khasi. Kum ban shu kdew hangne ki pulit ki la syrtap hakhmat ka ophis ka Bharatiya Janata Party ban pahara, hadien ba ka Hynñiewtrep Youths Council ka la byrngem ban leit tur ha katei ka ophis.
