Shillong, Rymphang 25
Ka National People’s Party (NPP) ka pynpaw ïa ka jingsngewkhia kaba jur halor ka jingkren kaba long kum ka jingpynpait pynpra, kaba dang shen kaba la kren ne kynthoh da u Sunil Deodhar uba dei u nongïalam ka RSS ha ka jingïalang jong ka Indigenous Conference kaba la long ha ka shnong Pynter, East Khasi Hills Meghalaya.
Ka NPP ka pynrem jur ïa ki jingkynnoh khlem nongrim ba la leh pyrshah ïa ka Sorkar.
Ki jingkynnoh ki long kiba bakla bad kaba khlem jingshisha bad kaba thmu ruh ban pynmih ïa ka jingshun bad jingïapher ha ka imlang sahlang. Kumta la kyntu ïa baroh ban kyntait ïa kum kine ki jingkren pynpait pynpra hynrei ban kyntiew ïa ka jingïatylli mlon kum kawei.
Kum ka seng kaba kut jingmut ban aiti bad ban kyntiew ïa ka jingïatylli ha ka imlang sahlang bad kan ïai trei na ka bynta ka jingïatylli bad ban pynthikna ba baroh kin lah ban im lang kum kawei khlem kano kano ka jingtieng ne jingshah pynsheptieng.
Kum ki nongïalam kiba don ka jingkitkhlieh ban wanrah ïa ka jingsuk, ka jingïaishah, ka jingïasngewthuh jingmut bad ka jingïatylli, ka NPP ka dawa jingpanmap bad ka jingkitkhlieh na ka bynta ka jingkren kaba pynjah burom bad kaba khlem nongrim ba la kren da utei u nongïalam jong ka RSS. Kane ka long katkum ka kyrwoh ba la phah da u Bah Himalaya M Shangpliang, nongaiktien ka NPP.
Dei ban kem bad pynshitom ïa u Sunil Deodhar ba u kren beiñ niam: NCP
Da ka jingsngewkhia halor kane ka jingkren utei u nongïalam ka Bharatiya Janata Party (BJP) ka Nationalist Congress Party (NCP) Meghalaya Unit ha ka sngi Balang ka la ujor ejahar pyrshah ïa u ha Sadar Police Station ban dawa ba ki bor pulit ki dei ban kem ïa utei u briew bad pynshitom.
Ha ka ejahar ka NCP ka la kdew ba ïa u Sunil Deodhar dei ban pynshitom katkum ka Section 196/197,299 bad 353 jong ka Bharatiya Nagarik Suraksha Sanhita (BNSS), 2023.
U Bah Donkupar Nongrum, NCP State Youth President Meghalaya u la ong ba ka jingkren jong utei u briew ka long kumba wan ban pynshit niam bad shim kabu ïa ka jinglui-lui jong ki briew hapoh jong ka ri Khasi. “Ha ka Jylla Meghalaya don shibun ki kynhun niam kum ki Hindu, ki Muslim, ki Khristan niamtre lane niam Khasi, ngi ïa mane laitluid bad kam ju don ka jingïakdew kti iwei ïa iwei bad ngi ïa long beit kum shipara.”
U la ong ba na ka liang ka NCP Meghalaya Unit ka pynrem jur ïa kane ka jingkren jong u tei u briew kaba la ktah matïong ïa ka jaitbynriew Khasi, kumjuh kum ki Khristan bad kane ka jingkren jong u ka dei tang ka jingïalam bakla jong u. “Ka jingleh jong u ka pynsngewsih ïa ngi ki paid Khristan, nga pynrem jur ïa kane kumjuh ruh dei ban kem ïa u bad u dei ban pynshai ruh halor ka jingkren jong u,” la ong u Bah Donkupar.
