Shillong, Rymphang 25
Ka ‘thei ïalehkai ka Jylla ka Dakahi Kyndait ka la wanrah nam bad burom ïa ka Jylla hi baroh kawei da kaba ka la wan ha ka kyrdan balai ha ka Pangong Frozen Lake Marathon 2026 kaba la long ha ka sngi Ba-ar ha Ladakh.
Kane ka nongmareh kaba na shnong Mukhaïalong kaba na East Jaiñtia Hills District, ka la lah ban pynpaw ïa ka jingtbit na ka bynta ban wan ha ka kyrdan balai ha ka jingïakop mareh kaba 42 KM Open jong ki kynthei.
Ïa kane ka marathon kaba la neh ar sngi kynthih la pynlong ha ka 24 bad 25 tarik mynta u bnai da ka The Thin Ice Adventure, Leh ha ryngkat ka UT administration, Leh, Servo Indian Oil bad kiwei kiba la ïasnoh kti lang. Te kumta la phiah ïa kane ka jingïakop ha la ki jong ki kyrdan kata ka 42 km bad ka 10 km ha ka sngi kaba nyngkong, ha kaba la pynbud sa ka 22 km bad 6 km ha ka sngi kaba ar.
Ha katei ka sngi kaba nyngkong la sakhi ïa ka jingwan shim bynta da 46 ngut ki nongmareh ha ka jingïakop mareh kaba 42km halor u thah, katba 185 ngut ki nongmareh kiba la lah ban pyndep ha ka jingïakop mareh kaba 10 km, kaba pyni ïa ka jingshah shitom ki nongshim bynta wat hapdeng ki jingkhriat bad long kynjang na sla duriaw kaba tap da u thah ha baroh kawei ka jaka. Ka Frozen Pangong Lake Marathon ka dei kaba la rung hapoh ka Guinness World Record.
Nalor ka Dakahi, kiwei pat ki nongjop kiba la khur ïa ka takma ksiar bad rupa ha ka 42 KM Open (Female) ki long ka Skarma Idong bad ka Ang Furba Sherpa. Ha ka liang ki shynrang la jop da u Tsering Norboo, Tsering Stobgais bad u Khadim Hussain, kiba la khur ïa ki takma ksiar, rupa bad rnong.
Haba phai sha ka 10 KM Open (Female) la jop da ka Yeshi Sangdol, ba-ar ka Tashi Dolkar bad ka Rinchen Dolker. Katba ha ka liang ki shynrang la jop da u Mehboob Ali, Rinchen Gurmath bad u Jigmet Stobdan, kiba la khur ïa ki takma ksiar, rupa bad rnong.
Halor katei ka jinglah ban wanrah nam bad burom ka Dakahi Kyndait ïa ka Jylla, na ka liang u Myntri Rangbah ka Jylla u Conrad K Samgna u la ai khublei ïa katei ka samla. Ngi sngewsarong halor ka jinglah ka Dakahi ban pynpaw ïa ka jingtbit bad ngi kitbok ba nangkiew shaphrang ha ki snem ki ban nangwan.”
Ha kawei pat ka liang u Myntri ka tnat ïalehkai u Bah Wailadmiki Shylla u la pynpaw ka jingsngewkmen halor ka jingjop jong ka. “Ka jingjop jong ka, ka long ka jingmynsiem shisha. Ka Dakahi ka la wanrah ïa ka burom kaba khraw ïa ka jylla Meghalaya lyngba ka jinglah ban ïaleh bha bad ka jingaiti lut met bad mynsiem jong ka. Ka jinglehkai ha kum kine ki jaka kiba long halor kynjang na sla duriaw ka pynpaw ïa ka jinglong ryntih bad jingshlur jong ka. Nga ai ka jingïaroh ïa ka mynsiem bad ka jingaiti lut jong ka bad nga kitbok kitrwiang ïa ka ba kan nangjop ha kiwei pat ki jingïakop ki ban wan hadien.”
