Shillong, Rymphang 25
U coach batting jong ka kynhun ïalehkai ka India u Sitanshu Kotak ha ka sngi Balang u la pynpaw ba u Rinku Singh u la wanphai biang sha ka kynhun ha ka por janmiet.
“U Rinku Singh u la ïasoh biang bad ka kynhun ha ka por janmiet, hadien ba u la leit phai sha la ïing na kadaw ka jingshitom u kpa jong u,” la ong u Kotak ha ka jingïalang bad ki lad pathai khubor ha ka sngi Balang, hashwa ba ka India kan pynkhreh ïa ka jingïalehkai kaba kongsan jong ka Super 8 pyrshah ïa ka Zimbabwe ka ban long ha ka sngi Palei ha Chennai.
Kat kum ki khubor la ong ba u Rinku Singh ha ka sngi Ba-ar u la leit phai sha la ïing namar ki kam ïing kiba kyrkieh.
Te kumta u Rinku um shym la don bynta bad ka kynhun ha ka jingkilanmet ha MA Chidambaram Stadium myn ha ka sngi Ba-ar, katba baroh kiwei pat ki nongïalehkai ki la don bynta lang.
Kumba ka paw ïa u kpa jong u Rinku u Khanchand Singh la pynkit sha jaka sumar kaba ha NCR namar ka jingshitom jur bad dei na katei ka daw ba u la hap ban leit phai kyrkieh sha la ïing.
Ka jingmih kyrkieh u Rinku na katei ka jingkilanmet ka la mih ka jingartatien halor ka jingïadon bynta ka jong u na ka bynta ka India kaba donkam ban khur jingjop ha ka jingïakhun kaba ar jong ka Super Eights pyrshah ïa ka Zimbabwe ha ka sngi Palei.
Kumba ka paw u Rinku u la ïoh da ka ‘duck’ ha kaba ka India ka la shah rem da 76 run ha ka South Africa ha Ahmedabad, katba u la tied 6 run ha ka jingïalehkai group pyrshah ïa ka Netherlands ha New Delhi.
Hashwa ïa kane, u la lah ban tied 11 run pyrshah ïa ka Pakistan, 1 run pyrshah ïa ka Namibia bad 6 run pyrshah ïa ka USA.
