Shillong, Rymphang 25
U Myntri Rangbah ka Jylla, u Conrad K. Sangma u la pynbna ïa ka jingpyllait baibam ‘CM’s Scholarship’ sha palat shi lak ngut ki samla pule ka ban long ha ka 6 tarik u Lber, kaba dei ruh ka jingrakhe dap 8 snem jong ka Sorkar Meghalaya Democratic Alliance (MDA) ha ka bor synshar.
“Ha ka jingshisha, ha ka 6 tarik u Lber, ka Sorkar MDA kan dap 8 snem ha ka Sorkar bad ka dei ka khyllipmat kaba sngew sarong ïa ngi na ka bynta 8 snem – ki paidbah ka Jylla ki la ailad ïa ngi ban shakri ïa ki,” la ong u Conrad haba jubab ïa ka jingïatai halor ka Mang Tyngka hapoh Ïingdorbar ha ka Sngi Balang.
“Kumta, ban rakhe ïa kata ka jingdap 8 snem jong ka jingpyndep ïa ka jingshakri sha ka Jylla bad ki paidbah ka Jylla, kum shi bynta jong ka prokram jong ngi, ngin sa pyllait ïa ka ‘CM’s Scholarship’ sha palat shi lak ngut ki samla pule ha ka 6 tarik u Lber,” u la bynrap.
U Conrad u la kdew ruh ïa ki jingpyrshang jong ka Sorkar ban kyrshan ïa ki khynnah skul, khamtam ha ki jaka nongkyndong, da kaba pynbiang ïa ki ‘Guidebook’ ban kyntiew ïa ka jingdon kiba ‘Pass’ ne ka ‘Pass Percentage’ ha ka Secondary School Leaving Certificate (SSLC).
“Ha ka klas 10, haba ai u khynnah u ïakhun ïa ka eksamin matrik, lada u khynnah u shah rem ha ka eksamin, ka jingim jong u khynnah ka kut noh hashuwa ba kan sdang wat ki jingangnud jong u ruh ki pulom noh. Bad kum ka Sorkar lada phim leh eiei shaphang kata bad ailad ïa kane ban bteng, bad ki khynnah – phi kren shaphang 20,000 ngut ki khynnah ki bym ‘pass’ ïa ka klas X, ka jingim jong ki kan sa thut noh. Kumta ka dei ka kamram jong ngi ban kyrshan bad peit. Kane kam dei ka eksamin IAS ne MCS. Ki don ka hok khnang ba ki lah ban ïaid shakhmat ha ka jingim bad dei da kata ka mynsiem ba ngi la ong, to ngin wanrah ïa ki ‘Guidebook’. Ki don ki ‘Guidebook’ ha kano-kano ka bynta jong ka ri. Man la ki klas X CBSE, ki Board ha ki Jylla bapher-bapher, ki Jylla ki pynbiang ïa ki ‘Guidebook’,” u la ong.
“Ki khynnah pule jong ngi ha ki jaka nongkyndong kim ïoh ïa kaba kum kane ka jait jingkyrshan, bad namarkata, ngi la wanrah ïa ki ‘Guidebook’. Nga ai khublei ïa u Myntri ka pule-puthi bad ka tnad kiba la trei halor kane; ka dei ka jingkyrkhu kaba khraw tam kaba ngi ai sha kine ki khynnah,” la bynrap shuh-shuh u Conrad.
