Khliehriat, Rymphang 26
Ka ding kaba klang ka la bam duh ïa kawei ka dukan ha ka shnong 4 Kilo, East Jaiñtia Hills ha ka jingjia kaba la jia ha ka 26 tarik Rymphang ha ka por kumba 1:30 mynstep.
Ka Kong Tillda Bamon kaba pynïaid ïa kane ka dukan kaba don harud surok mynta la palat 28 snem, ka pyntip ba ka daw jong kane ka jingjia la suba jur ba ka dei na ka jingthut ha ka bording ilektrik.
Ki nongïaid lynti kiba ïohi nyngkong ïa ka ding ki la leit ban kyrsiew mar mar ïa ka ha kaba ka la lait thaw da ka said da kaba pyndonkam tang da ka ben, bad ym shym la don mano mano ba mynsaw.
Ka jingduh na kane ka jingjia ka long kumba 8 haduh 10 lak tyngka, kata kynthup ïa ka fridge, ki tiar ki tar bad ki mar ki mata.
U Govinda Rajbongshi uba sah ha kane ka jaka u dang ïohthiah hadien ba u la ïoh sngew ïa ka jinglyniar jong ka Kong Tillda. Na ka liang jong u, u suba ba kane ka ding ka sdang na shabar jong u pud, kata ka lah ban dei ka jingthang namar ym don ka lain bording ha kane ka jaka.
Ki kali pynlip ding ki la wan poi hapoh ka shiteng kynta ryngkat ki san tylli ki trok ïakhun haduh saw kynta ban lah ban pynlip ïa ka ding.
U trai jong katei ka jaka u Bah Farewell Bamon haba kren lyngba ka phone um shym la suba halor kano kano ka kam bymman halor kane ka jingjia bad pynpaw ba ka jingduh ka long kumba T.20 lak, kata kynthup ïa ki dieng ba la buh, ki tanky buh um, ki tiar ki tar bad kiwei pat ki jingdon jingem. (Kane ka jaka ka dei kaba don ïa ka karkhana dieng ha ki snem kiba la dep).
Na ka liang ka Kong Tillda ka la kyntu ïa ki bor Sorkar ba dei khmih ba kin pynïoh ïa ka lad jingïarap namar ka dei kaba im jakpoh tang lyngba kane ka dukan.
