Jowai, Rymphang 26
U Ma Octomewot Lamin uba dei u MDC shu sieh barim ha ka 26 tarik Rymphang u la bam smai biang kum u MDC shu sieh jong ka Jaiñtia Hills Autonomous District Council (JHADC).
Ïa ka jingbam smai la pynïaid da u Chairman jong ka JHADC u Dr. Sankey Shangpung ha kamra treikam jong u, ha ka jingdonlang u CEM JHADC Ma Thombor Shiwat, ki MDC ka Liang Pyrshah na ka VPP, Congress, kumjuh ki MDC ka Liang Synshar NPP nalor ki katto katne ki ophisar JHADC.
U Ma Octomewat Lamin ha ka jingkren u la pynpaw ka jingsngewnguh ïa baroh ki MDC naduh ki MDC ka liang synshar bad liang pyrshah halor ka jingïatreilang na ka bynta ka bha ka miat jong ka council.
U kyrmen ba kane ka jingïatreilang kan dang bteng nangne shakhmat na ka bynta ban pynkhlaiñ shuh shuh ïa ka rukom treikam jong ka District Council.
