Shillong Rymphang 26
Ka Ri India kan pyrshang ban tehlakam ïa ka jingpang HIV hapoh ka 1 tarik u Nohprah 2027 kaba dei ka World AIDS Day, hapoh jong ka Mission AIDS Suraksha, la ong u Additional Secretary bad NACO Director General u Dr. Rakesh Gupta ha ka jingplie ïa ka jingïalang kaba 3 sngi jong ki jylla ka thaiñ shatei lam-mihngi kaba la long ha ka sngi Ba-ar.
Ka jingïalang ha Guwahati, kaba dei kaba nyngkong na ki 11 tylli ki jong ka Suraksha Sankalp Karyashalas kaba la thmu ban pynlong ha ka ri naduh u Rymphang haduh u Lber 2026, kala lumlang ïa ki 60 tylli ki District kiba hakhmat eh jong ki 7 tylli ki jylla ka thaiñ shatei lam-mihngi. Ka Meghalaya kala pynleit jingmut ha ka thaiñ East Jaiñtia Hills, East Khasi Hills, Ri-Bhoi bad West Jaiñtia Hills ha kaba ki kynhun jong ki district ki dang trei ïa ki kam ban poi sha ka kyrdan jong ka Surakshit Plus da kaba kynjoh sha ka 95-95-99 ïa ka thong: 95% ki briew kiba im bad ka jingpang HIV bad ka jingtip ïa ka jinglong jingman ka jong ki, 95% na ki kiba don ha ka ART bad 99% kiba dei kito kiba la ïoh ïa ka jingsumar.
“Ki jylla ka thaiñ shatei lam-mihngi ki dei kiba la buh hakhmat eh, 60 na ki 219 tylli ki district kiba la buh hakhmat bha ki don hangne,” ong u Gupta bad ka bynrap ba kane ka jingïalang ka dei ka jingsdang ïa ka sienjam jong ka jingshimkhia kaba thikna, kaba pynleit jingmut ïa ka thaiñ bad ki jingleh bad ki jingpynkhreh ïa ki rukom pyntrei ïa ki kam ki jam.
Ki ophisar ki dang khmih bniah ïa ka jingpyntreikam ïa ka NACP, ban khmih bniah ïa ki Micro-Level Indicators, Local Epidemiology, ki jingduna bad ka jingpynkhreh ïa ka jingthaw ïa ka State Specific Corrective Plans. Ha kane ka jingïalang la wan ban ïashimbynta da ki Project Directors jong ki State AIDS Control Societies bad kiwei kiwei ban ïatai halor ki mat ki bapher-bapher ha kane ka jingïalang.
Ka Sorkar kala ong, ba kane ka jingïalang ka dei ban pynmih ïa ki buit treikam ha ki district ban pyntreikam ïa ka jingthrang ka ri ban pynduh noh ïa ka jingpang HIV/AIDS kum ka jingpang kaba buh ha ka jingma ïa ka koit ka khiah ki paidbah bad ban pynurlong ïa ka nongrim jong ka Mission AIDS Suraksha.
