Shillong, Rymphang 26
Ka Sorkar Jylla kala thung ïa ka State Level Task Force (SLTF) bad ki District Task Force nalor ka jingpynsdang ïa ka GIS mapping ïa ki jaka ba don ki khñiang bad ka jingsynreit dawai da ki drone ban ïakhun ïa ka jingbam khñiang ki shylluit ha ki jaka rep diengkwai.
Ïa kane la pyntip da u Myntri ka tnad ka rep ka riang u Timothy D Shira ha ka jubab bala wanrah ha ïingdorbar ha ka sngi Balang, uba la pyntip ruh ba ka tnad kala ïatehlok bad ka CPCRI na Kerala ban kam ïa ka jingpur ka jingbam khñiang ki shylluit diengkwai.
U Timothy Shira u pyntip ba ïa ka jingpynkhuid ba ju pynlong manla u bnai la pyntip ha ka Meghalaya ONE Portal bad la ai jinghikai ïa ki nongrep ba kin ithuh bad tehlakam ïa ka jingbam khñiang.
Ki don ruh ki jingbthah bala shon ha ki kot lyngkdop, kiba la pynkhreh da ki saiantist ka ICAR, KVK, MBMA bad CPCRI la sam sha ki nongrep nalor ka soskular bad ka CPCRI Kasaragod kaba la ïasoi ha ka 28 tarik Risaw 2025 ban pynroi ïa ka kam rep kwai.
Lah leh ruh ïa ka GIS assessment ha North Garo Hills ha ka 28 tarik Kyllalyngkot haduh 6 tarik Rymphang 2026 bad ka MBDA bad ïa kane yn sa leh ruh ha kiwei ki District. Shuwa kane, la leh ruh ïa ka drone mapping ha WGH (14-15 Nailar 2025) bad la pynbud da ka Bordeaux mixture spraying (10-14 Naiwieng 2025) bad ka NECTAR bad SVM.
U Myntri u la bynrap ba ka tnad kala sam ruh ïa ki dawai pynïap khñiang bala ai subsidy sha ki nongrep kwai.
Na ka bynta ki nongrep ba shah ktah, ka Sorkar kala sam ruh ïa kiwei pat ki jait jingthung-ki lakait, sohtrun bad sohmarit-hapoh ka skhim FDS bad RKVY.
