Shillong, Rymphang 26
Ka Khun Hynñiewtrep National Awakening Movement (KHNAM) ha ka sngi Palei jong ka taïew, ka la leit buh da ka jingthoh ha u Chief Executive Member (CEM) ka Khasi Hills Autonomous District Council (KHADC) bad Executive Member ba bat ïa ka tnad pule-puthi ban pan jingshai halor ka jingpynlut ka District Council ban bei pisa ïa ki jaka pule kiba hap hapoh ka District Council.
Haba kren sha ki lad pathai khubor u Bah Thomas Passah, Working President u la ong ba ka KHNAM lyngba ka Right To Information (RTI) ka la pan ruh ïa ka Utilization Certificate na ka District Council halor kane ka jingpynlut hynrei na ka liang u PIO u la pyntip ba ka District Council kam ju pan ïa ka Utilization Certificate.
“Ha ka jingpan jubab na ka District Council ngi la lap ba ha kine ki san snem ba la leit ka District Council ka la pynlut kumba 86 klur tyngka ban ai jingïarap sha ki jaka pule kiba hap hapoh ka jingkhmih jong ka,” la ong u Bah Thomas.
Kumta halor kane ka bynta ba ka KHNAM ka sa buh da ka jingthoh sha District Council, ba ka dei ban pan ïa ka Utilization Certificate na kine ki skul ba kumno la pyndonkam ïa ka pisa khnang ba kan don ka jingkhuid jingsuba ha ka liang ka jingpyndonkam ïa ka pisa u paidbah.
Nalorkata, u la ong ruh ba ha ka jingshisha haba la ai ïa ka pisa u paidbah ha kino-kino ki jingdonkam, donkam ban pynshisha ba ïa kato ka pisa la pyndonkam hok ha ka lynti kaba dei bad kaba pynthikna ïa kane la donkam bha ïa ka Utilization Certificate kaba mut la ai ïa ka pisa sha kawei ka skul bad hadien ba la pyndonkam ïa kata ka pisa, ka skul pat ka hap ai jingtip kaba kham bniah ba kumno la pyndonkam ïa kane ka pisa, khnang ba kan don ka jingkhuid jingsuba.
“Ngi khmih lynti da ka jingthmu ban wanrah ïa kata ka synshar kaba khuid jingsuba bad ban rat dyngkhong ïa kino ki bym dei ha ka lynti kaba bha ne kam bamsap, ka District Council kan sngap ïa kane ka jingkyrpad ka KHNAM,” la ong u Bah Thomas.
