Shillong, Rymphang 26
Ka United Democratic Party (UDP) kan shong jingïalang hadien ba kut ka dorbar mang tyngka ban shim ïa ka rai halor ki ar tylli ki ilekshon- ka ilekshon sha ka Garo Hills Autonomous District Council bad ka ilekshon shiteng samoi (bye-election) ha Shillong Parliamentary Constituency, hadien ka jingkhlad noh u MP uba dei na ka VPP Dr. Ricky AJ Syngkon.
Haba kren sha ki lad pathai khubor ha ka sngi Palei, u President ka UDP Bah Metbah Lyngdoh u la ong, “Kumba ka long mynta, ngim pat ïakren eiei ha ka seng, kumta ka seng ka hap ban shong shwa… Hadien ka dorbar, thikna ba ngin sa ïakren kum ka seng halor ka ilekshon shiteng samoi jong ka MP.”
Ha kaba ïadei bad ka ilekshon sha GHADC, u Bah Metbah Lyngdoh u la bynrap, “Na ka bynta kane ruh, ngi la bunkam palat ha ka dorbar mang tyngka. Kumta hadien ka dorbar, lehse ha ka taïew ban wan shwa ka 10 tarik, ngin sa pyrshang (ban shim ïa ka rai). Ngin sa ïakynduh shwa bad ngin sa shim ïa ka rai.”
Une u Nongïalam ka UDP u la pynshai ba ki nongïalam ka UDP na rilum Garo kin sa ïakynduh ban bishar bniah ïa ka kaei kaba bha tam na ka bynta ka ilekshon GHADC ha u snem 2026.
“Ngi la shaniah ha ki nongïalam ka seng jong ngi kiba peit ïa ka thaiñ rilum Garo baroh kawei ba kin shong ban ïakren, bad ynda la kut ka dorbar mang tyngka, ngin sa ïakynduh ïa ki bad pan jingmut na ki, la ngin ïakhun ne em ïa ka ilekshon,” u la ong.
