Shillong, Rymphang 26
U Myntri Rangbah ka Jylla Conrad K Sangma ha ka sngi Palei, u la tyrwa ban pynlong ïa ki jingai jinghikai ba kyrpang ha ki ktien trai ri na ka bynta ki nongthaw aiñ, haba ai jingmut ba ki MLA na ri-lum Garo kin hikai ïa ka ktien Khasi bad kiba na ri-lum Khasi-Jaiñtia kin hikai ïa ka ktien Garo ban long ka nuksa ïa ki nongshong shnong hapdeng ka jingpyrshang jong ka Sorkar ban pynthikna ïa ka jingnang ïa ki ktien trai ri ha ka thungkam Sorkar.
Haba jubab hapoh ka ïingdorbar, u Conrad u la ong, “Kan long kaba itynnad lada ngi don ïa ka jingshim klas ïa ki MLA-ka jingai jinghikai ba 10 lane 15 sngi-ha kaba ki MLA na ri-lum Garo kin hikai ban nang ïa ka ktien Khasi bad kito kiba na ri-lum Khasi- Jaiñtia kin nang ïa ka ktien Garo. Kane kan phah ïa ka khubor kaba bha….ba ngi la ïalam hi nakhmat”.
Ka jingkren u Myntri Rangbah kala mih haba jubab ïa u MLA ka TMC Dr Mizanur Kazi, uba la pynpaw ïa ka jingsngew-khia halor ka rai ba dang shen jong ka Sorkar ban pynlong kongsan ha ka ban nang kren ïa ka ktien Khasi bad Garo ha ka thungkam ki District Selection Committee (DSC).
U Kazi u la ong ba ka policy ka lah ban ktah ïa ki samla ba khlem kam ha ki jaka them jong ka ri-lum Garo namar ki jingai jinghikai ïa ki ktien trai ri ka tlot bha, bad kyrpad ïa ka Sorkar ban ai ïa ki jaka ai jinghikai bad ka por pynkhreh kaba biang.
U Myntri Rangbah u la pynshai ba kane ka sienjam kam dei kaba thmu ban kyntait ïano ïano.
“Nga pynthikna ïa baroh ki dkhot ba ïa kane la leh da ka jingthmu ba kino kino kiba ïakhun ïa ka kam Sorkar, ki dei ban nang ban kren ïa ka ktien trai ri. Kam dei ka sobjek kaba eh-hynrei donkam tang ka jingïakren,” u la ong.
U Conrad u la ban jur ba donkam tang ban nang kren ym ka thoh ka tar.
“Lada kim nang ban kren Garo ne Khasi, kan ktah ïa ka jingai jingshakri jong ki namar kin hap ban ïakren ïakhana bad ki trai shnong. Kane kam mut ban pynduh ïano ïano, hynrei ban pynthikna ba kin nang ïa ka ktien ba kin ïakren ïakhana bad ki briew ba ki ai ka jingshakri”.
U la bynrap ba bun ki nongshong shnong ha ki jaka them ka ri-lum Garo ki dei kiba nang ban kren Garo. “Nga don bun ki paralok ha Selsella bad ki jaka them, bad baroh na ki, ki kren Garo. Kumta, kam don jingeh satia,” u la ong.
U Conrad u la kdew ruh ïa ka rai ba dang shen jong ka Kynhun Myntri ba pynlong kongsan ban pule ïa ka ktien Khasi bad Garo ha ki skul Primary bad ïa ki kot la nang pynkhreh mynta.
“Ngi sngew sarong bha ïa la ka jong ka ktien. Da kane ka jingthmu, ngi la wanrah ïa kane ka policy hynrei ki briew kim dei ban khuslai satia,” u la ong.
