Nongstoiñ, Rymphang 26
Ha ka sngi Palei ka Meghalaya State Skills Development Society (MSSDS), kala ïoh ban pynlong ïa ka recruitment drive ha Nongstoiñ, WKHD, kaba dei ruh kawei na ki prokram ban ai jinghikai, ka jingthep kam shabar ka Jylla bad shabar ka Ri India bad ban pyni lynti ïa ki samla ha ka wad kam wad jam.
Ïa katei ka recruitment drive la ïoh ban pynlong hapoh Don Bosco Tech Nongstoiñ ha kaba la ïadon lang ruh ki ophisar na ka MSSDS, na ka tnad Labour, Employment Exchange bad ha kane ka sngi la sakhi ruh ïa bun bah ki samla wad kam kiba la wan ban ïashim bynta ha katei ka prokram.
U Bah Khampynjanai Kharmawlong, Skill Development Officer MSSDS ka WKHD, haba ïakren bad ki nongthoh khubor u la ong, ka jingthmu jong kane ka prokram ka long ban ai rynsan ïa ki samla kiba wad kam wad jam bad ki jaka trei ne ki placement kim da dei eh tang hapoh ka Ri India hynrei ki don ruh ki overseas placement kiba dei sha bar jong ka Ri India.
Shuh shuh u la ong ba lyngba kane ka recruitment drive, ka ophis jong ka MSSDS kan screen lane scrutinize ne peit bniah ïa ki khynnah kiba bit kiba biang ban phah ïa ki shabar jong ka Ri India bad ïa mynta ki recruitment agencies ki ailad ha ngi ban leh ïa ka preliminary interview bad hadien ba la jied ïa ki khynnah, kan sa dei sa ka kamram ka jong ki agency ban jied ïa ki samla.
U la kyntu ruh ïa ki khun samla ki bym don kam don jam ba kin shim ïa kiba kum kine ki kabu khnang ba kan long ka jingmyntoi ïa ki ha ka ïoh kam ïoh jam bad u la ong ruh ba na ka liang jong ka ophis MSSDS ka ai ïa ki skills training ki bapher-bapher khnang ba lada ki wan biang kum kine ki recruitment drive ki samla wad kam kin lah ban ïashim bynta bad lehse kan long ka jingplie lad na bynta jong ki.
Ha kaba ïadei bad ka jingjied, u la ong ba yn kham pyrkhat ïa kito kiba don ïa ki skills training bad kin don ki Ri kiba ym donkam ban leh ïa ki language training katba ki Ri kum ka Japan bad Germany ki don ki jait kam ba hap ban leh ïa ki language training kaba shimpor kumba 6 bnai haduh 1 snem eiei.
