New Delhi, Rymphang:
Ka la don ka jingujor ejahar ha kaba ïadei bad ka jingshah siat ha ka por miet ïa kawei ka kali kaba kit ïa u nongïasaid aiñ uba don jingïadei bad u Lawrence Bishnoi uba don bynta ha phatok hajan ka ISBT ha Kashmere Gate, la ïathuh ki pulit ha ka sngi Balang.
La kynnoh ba u Gangster u Naveen Boxer u la shim ïa ka jingkitkhlieh halor kane ka kam thombor lyngba ka jingthoh ha ka Social Media kaba la kam ba ka dei na u. Ïa ka mukotduma la ujor ha Kashmere Gate Police Station katkum ka kyndon 109(1) bad 3(5) jong ka Bharatiya Nyaya Sanhita bad ka Arms Act halor ka jingmudui jong u Advocate Deepak Khatri, la ïathuh u heh pulit.
U Khatri kham hashwa u la ïohpdiang ïa ka jingshah byrngem thombor, la ïathuh shuh shuh ka tyllong khubor ba la wan na ki pulit. Ha ka sngi Ba-ar ha ka por kumba 10.10 baje mynmiet, kawei ka kali ka la shah siat hajan Marghat Wale Hanuman Temple kaba don marjan bad ka ISBT. Ki don san ngut kiba shong ha katei ka kali ha ka por ba jia katei ka jingjia.
Uwei u briew uba shong ha ka kali u la mynsaw na ka jingdei kuli na ka tyrpeng bad u la shah pynkit sha ka jaka ai jingsumar.
Kumba la ïathuh la ong ba u la lait na ka jingma, la ïathuh u heh pulit. U Deputy Commissioner of Police (North) u Raja Banthia u la ong ba ki briew kiba shong ha katei ka kali kim shym la lah ban tip shai haduh katno ngut ki runar ki la don ban thombor pyrshah ïa ki.
Ha kajuh ka por, ka jingthoh ha ka Social Media ka la mih ym slem hadien ba la jia ka jingjia ha kaba la kynnoh ba u nongleh kam sniew u Naveen Boxer u la shim ïa ka jingkitkhlieh halor katei ka jingjia jong ka jingsiat.
Kane ka khubor, kaba la pynsaphriang na ka Profile kaba don ïa ka kyrteng bad ka dur jong u, ka la kdew ba ïa katei ka kam thombor, la leh da ma u bad ki paralok jong u bad la pynmih ruh ïa ki jingbyrngem ïa u Khatri.
“U trei kum u nongai khubor bad u nongkhaïi mar na ka bynta u Lawrence. Phi pynbeit ïa ki jingïateh ban shim pisa bad wanrah jingtip ha ki por jingïalang, sangeh noh ban leh ïa kane. Lym kumta, ki kam jong phi kin shah ktah bad ka ïing ka sem jong phi baroh kawei kan hap ban mad ïa ka jingeh,” la ong ka jingthoh ha ka rynsan Social Media.
Ki pulit ki la ïathuh ba ki dang khmih bniah ïa ka jingshisha jong katei ka Social Media Account bad katei ka jingkynnoh. “Ngi dang bishar bniah ïa ka khubor bad ka jingsdang jong ka. Yn shim ïa ki sienjam kiba biang katkum ka jinglap,” la ong uwei u ophisar.
Ka kynhun wad bniah ka la jurip ïa katei ka jaka bad lum ïa ki sakhi. Ki dur CCTV na ki jaka ba marjan ki dang shah Scan ban ithuh ïa ki nongthombor bad ban wad ïa ka lynti ba ki la phet na katei ka jaka, la bynrap ki pulit.
