Khliehriat, Rymphang 26
Ki pulit ka East Jaiñtia Hills District kila kem ïa ki 9 ngut ki nongbylla bad kurup ruh haduh 55 MT u dewïong beaiñ ha ka thaiñ Umthe ba hap hapoh ka jingpeit jong ka Umpleng Police Outpost.
Kane kala wan hadien ba ki pulit kila pyntreikam katkum ki jingtip ba kyrpang ba la ïoh lyngba ka jingpeit bniah da ki Drone.
Ki pulit kila pyntip ba ha ka 26 tarik Rymphang kila pynlong ka jingkhynra par dewïong beaiñ ha ka thaiñ Umthe bad lap ïa kawei ka par dewïong kaba dang treikam bha kaba pyn-kheiñ ïa ki kyndon kiba ïadei bad ka mariang kumjuh ka aiñ tih mar pohkhyndew.
Ha kane ka jingkhynra, ki pulit kila lap ruh ïa ki 9 ngut ki nongbylla kiba trei ïa ki kam tih dewïong ha katei ka jaka. Ïa kane ka jingkhynra la pynlong da ka jingbud ryntih ïa ki kyndon ba la buh da ka National Green Tribunal (NGT) halor ka jingtih bad shalan dewïong beaiñ, kumjuh ruh da ka jingbud ryntih ïa ki jingbthah ba la pynmih da ka ïingkhashari jong ka Meghalaya na ka bynta ban pynjari da kaba tyngeh ïa ki kam tih dewïong beaiñ ha ka Jylla.
Ïa u dewïong ba la sei uba don ha katei ka jaka ba la antad ba u don 55 MT la kurup noh ha katei ka jaka ha ka jingdonlang u Executive Magistrate.
La pyntip ba baroh 9 ngut ki nongbylla kiba donkti ha ka kam tih dewïong beaiñ la kem bad la rah ïa ki sha phatok na ka bynta ban leh ïa ki jingdonkam katkum ka aiñ.
Halor kane, la register ïa ka FIR bad ka jingtohkit kaba kham bniah ka dang ïaid shakhmat ban lap shuh shuh ïa ki briew kiba donkti ha kaba bei tyngka, bad pynïaid ïa katei ka par dewïong beaiñ.
