New Delhi, Rymphang:
Ka kynhun Enforcement Directorate (ED) ka la kurup ïa ki jingdon jingem kiba shongdor T. 598 klur ha Agra halor ka mukotduma jong ka jingkamai ïa ka spah bymhok pyrshah ïa ka Ansal Properties and Infrastructure Ltd.
Ka kynhun ED ka la sdang ïa ka jingtohkit katkum ka jingujor ejahar ba la buh da ka kynhun Central Bureau of Investigation (CBI) katkum ka jingbthah jong ka Supreme Court.
Katei ka mukotduma, ka dei kaba ïadei bad ki jingleh bymsuidñiew kiba jur ha ka jingshim bad jingpyllait jaka hadien ha Sector 58 haduh 63 bad 65 haduh 67, ha Gurugram, Haryana.
La pynbna ïa ka jaka tynrai ban shim katkum ki kyndon 4 bad 6 jong ka Land Acquisition Act, 1894, na ka bynta ki jingthmu ba la kdew kum ka jingpynroi da ka HUDA bad ka jingthaw ïa ka Land Bank.
“Hynrei, bun na kum kine ki jaka la pyllait hadien ha ka liang jong ki nongsynshar riew shimet lyngba ka rukom thok bad ka jingïateh lok. Kum kine ki kam ki la pynduhjait ïa ki jingïada aiñ kiba synshar ïa ka jingshim jaka bad ki la pynthut ïa ka jingshai kaba la khmih lynti ha ki kam kiba ïadei bad ka jingthmu da ka sorkar jylla,” ong ka tnad.
Ha ka jingtohkit, ka tnad ka lap ba ka kompeni ka la don ha ki jingïateh kular ban ïatreilang bad ka la ïoh ïa ki General Power of Attorneys (GPA) na ki trai jaka shimet ha kaba ïadei bad ki jaka ba la dep pynbna ban shim.
La lap ba kine ki jingïateh ki mad ïa ki jingeh namar ka jingjur jong ki jingbym ïaid hok ki jingtreikam, kynthup ka jingbym don lypa ïa ka jingkitkhlieh ha ka ban pynmih ïa ka jingpynbna jong ka Section 4, ka jingbym don ki kyndon ba kongsan jong ka jingïateh, bad ki jingpynkylla hadien ka jingjia.
Ka jingtohkit ka pyni shuh shuh ba, hadien ka jingpynmih ïa ki jingpynbna ban shim jaka da ka sorkar jylla, ka jinglong ba la pynbna jong ka jaka ka la pynmih ïa ka jingbym thikna bad ka la pyntlot beit ïa ka kyrdan ïateh kular jong ki trai jaka shimet shimet.
“Ha kum kine ki jinglong, la pynsuk ïa ki jingpynkylla ha ka liang jong ki nongsynshar riew shimet ha ka dor kaba kham duna bha ïa ka dor ïadie ïathied kaba mynta, kaba la wanrah ïa ka jingmyntoi kaba bakla ïa ka kompeni bad ka jingduhnong ha ka liang ka pisa tyngka kaba ïadei bad ki trai jaka kiba shah ktah,” ong ka tnad.
Da kaba pynshong nongrim halor kum kine ki jingpynbeit, la ai license sha ka APIL da ka Department of Town and Country Planning (DTCP), Haryana, na ka bynta ban pynroi ïa ki Residential Plot Colonies kiba heh haduh 142.306 akar ka jaka ha ka shnong Badshahpur, Gurugram.
