Shillong, Rymphang 26
U nongïalam ka United Democratic Party (UDP) uba dei ruh u Myntri ka tnad bording u Bah Metbah Lyngdoh u la kyntait ïa ki jingong ba don ka jingïapher jingmut hapoh ka party, da kaba u la ong ba u dei u briew uba pyrkhat ïa ka ba bha bad uba pynleit jingmut ïa ki jingïakren kiba lah ban tei.
Haba kren sha ki nongthoh khubor ha ka sngi Palei, u la ong ba na ka liang jong u um don daw eiei bad pynpaw ba u dei u briew ba shai ka jingmut jingpyrkhat khlem buhrieh eiei bad u ju pyrkhat ïa kaba bha, “Kaei kaei kaba ngi ïakren hapoh ka ïingdorbar ka long beit na ka bynta ka bha ka miat jong ki paidbah nongshong shnong jong ka Jylla,” u la ong.
Haba kylli ïa ka jingïapher jingmut bad u para nongïalam ka party u ba long u nongmihkhmat ka West Shillong Constituency u Bah Paul Lyngdoh, u la jubab “Kaei ka jing-sngewthuh bakla bad balei phi kylli ïa kata ka jingkylli.? Ngam don ei ei ban ong. Nga la dep ïathuh ïa ka jingmut jingpyrkhat jong nga. Nga dei u briew uba pyrkhat ïa kaba bha bad ngam lah ban ong eiei bad u briew uba don ka jingmut bapher.”
U Bah Metbah u la pynpaw ïa ka jingdonkam ban pynneh ïa jinglong ba bha bad kaba ïatei hapoh jong ka ïingdorbar da kaba u la ong, “Nga la kdew mynta ka sngi ha ka ïingdorbar ba baroh ki mat ba la pynpaw da ki dkhot, la shim khia bad ngin shimkhia katkum ki jingdonkam bad ha ka por kaba biang. Uno uno u dkhot ruh u don la ka jong ka jingmut bad ka jingsngewthuh hynrei ka ïapher na uwei ha uwei bad ngam don eiei ban ong haba ïadei kata, tangba nga ïohi ba baroh ki MLA ki ju ïasam ïa ki jingai jingmut jong ki.”
Haba bynrap u Bah Metbah u la ong, “Ngi dei ki nongïalam, kumta ngi dei ban leh kum ki nongïalam. Haba ngi don hapoh ka ïingdorbar, ngi dei ban shim ïa kano-kano ka kam da ka jingmut kaba bha bad kaba lah ban tei.”
