Kyntait u Myntri Rangbah halor ka jingkam ba ki prokram ai kam ka Sorkar ki la pulom

Shillong, Rymphang 26

U Myntri Rangbah ka Jylla Conrad K Sangma ha ka sngi Palei u la kyntait ïa ka jingkam ka Liang Pyrshah ba ki prokram aikam aijam jong ka Sorkar kila pulom, haba ban jur ba lada phai sha ka jingdon paid ki samla ha Jylla, ka dawa ïa ki lad jingïarap kiba neh bad ki skhim kum ka FOCUS bad CM-Elevate kila pyni ïa u soh.

Haba jubab ïa ki jingkylli u MLA ka TMC Dr Mizanur Kazi, ba ka jingbym ïohkam ïohjam ki samla kala kiew namar ka jingpulom ki Policy, u Conrad u la ong, “Ban shu pynkut ba ki policy ki pulom ka long ka bym dei satia. Lada phi khmih ïa ka survey, ki ïapher-6.0 ha u 2022-23 bad 6.2 ha u 2023-24 ha ka periodic labour force survey bad 3.1 ha ka CMIE estimate. Kine la pynshong nongrim na ki samla ba ki nombor ki lah ban ïapher.

U la pynpaw ïa ki sienjam bala shim da ka Sorkar ban pynpaw ba haduh 3.66 lak ki kam la lah ban pynmih ha kine ki khyndiat snem bala leit.

“Lehse ngim pat lah ban pyndep pura ïa ka thong, hynrei ka dei ka kam kaba dang ïaid bad ngi la don ha ka lynti kaba dei,” u la ong.

U Myntri Rangbah u la ban jur ba ki paid nongshong shnong ka Meghalaya ki bun ki dei kiba dang khynnah. “Kumba 50% na ki nongshong shnong jong ngi ki dei kiba hapoh 20 snem. Ngam ai daw satia, hynrei dei ka jingsngewthuh ïa kine ki jingeh, ngi hap ban wanrah kham bun ki prokram ban lah ai kam lyngba ki mission bapher bapher”.

Halor ka FOCUS scheme, u Conrad u la ïathuh ba T.140 klur la dep ban ai sha ki 22,500 ngut ki kynhun nongrep, kaba pynmyntoi ïa 2.1 lak ngut ki briew, katba ka FOCUS+ kala poi sha ki 1.5 lak ki nongïoh jingmyntoi. “Ki nongrep kila ïoh jingmyntoi bha. Kiba bun na ki, kila ai sakhi ba na ka pisa ba ki ïoh, ka jingpynmih mar jong ki kala kham bun. Ngin nang pynthikna ïa ki jingktah ba kham bun ha ki snem ban nang wan,” u la bynrap.

Haba kylli halor ka jingïoh ïa ki scheme ban sengkam lajong, u Conrad u la kdew ïa ka CM-Elevate, ka flagship prokram ka Jylla kaba kyrshan ïa ki nongsengkam, ka kam jngohkai, kam ïalehkai, ka bha ka miat bad kiwei kiwei ki jait kam.

“Tang hapoh 20 sngi, ngi la ïoh pdiang haduh 22,000 ki aplikeshon- La bun palat haduh ba ngi hap ban khang shipor ïa ka portal. Ki briew ki lah ban aplai lyngba ka Meghalaya One Portal,” u la ong.

Halor ka jingtreikam digital jong ka Employment Exchange, u la jubab ba ka Sorkar kala nang jam shakhmat ha baroh ki bynta jong ka jingshakri ban pyndonkam noh da ki kor digital bad kala shim ruh ïa ka sienjam ban pyntreikam noh da ki kor digital ha Employment Exchange ruh.

“Nga kular ïa ka ïingdorbar ba ki skhim bad ki prokram kin sa nang ïarap kham bun ha ki sngi ban wan nang,” pynkut u Conrad.