Shillong, Rymphang 26
“Nga dei u Myntri Rangbah (Chief Mini-ster) jong ka Meghalaya, ym tang jong ka National People’s Party (NPP)”, ong u Myntri Rangbah ka Jylla Conrad K Sangma haba pynksan ïa ka rukom sam song pisa ka Sorkar jong u.
U la kren ïa kane haba jubab ïa ki jingkynnoh u Nongïalam ka Liang Pyrshah Mukul Sangma ba ïa ka song pisa la pyndonkam ha ki kam ban myntoi ka saiñ pyrthei.
“Nga la ai skhim ïa baroh. Lada mano mano na kiwei ki seng saiñ pyrthei ki wan, ngam don jingwit satia,” ong u Conrad haba jubab ïa ka cut motion. “Nga la ai ha ki snem bala leit noh. Ha ka jingshisha, ha ki katto katne ki jaka nga la ai pynban kham bun ki skhim sha ba bun ki briew na ka Liang Pyrshah bad ki MLA jong nga kila dom ïa nga”.
U Conrad u ïathuh ba u la ong ïa la ki MLA, “Nga hap ban peit lang ïa baroh, ngam lah ban long Myntri Rangbah tang jong ka NPP, nga dei u Myntri Rangbah ka Meghalaya. Ha nga, ka Liang Synshar-Liang Pyrshah kam don jingïapher satia”.
“Mynta ngi don ha kawei ka liang bad mynta lada ïoh skhim kin sa wan sha ka liang jong ngi, kane ka ju jia naba ka kam ka ïaid kumne,” ong u Conrad haba bynrap “Kumta ngim dei ban ïaid da ka jingmut jingpyrkhat ba ngim dei ban ai ïa ki briew ba don ha ka Liang Pyrshah”.
U Conrad u la ban jur ba ïa ki skhim la ai haba pynshong nongrim katkum ka jingdonkam, ym ka jingïadei bad ki seng saiñ pyrthei. “Nga la ai skhim sha baroh. Lada wan mano mano na kano kano ka seng saiñ pyrthei, ngam don jingwit satia,” u la ong.
U Conrad u la ainam sha u Kpa ba la khlad noh, Purno A Sangma, uba pynwandur ïa ka rukom treikam jong u na ka bynta ka bha ka miat bad ka roi ka par.
“Nga hap ïathuh ha phi ba nga ïoh jinghikai ïa kane na u Kpa ba la khlad noh namar kane ka dei ka rukom ba u ju leh haba sam ïa ka skhim MP,” ong u Conrad bad bynrap “Mano mano ba wan ruh-nga ju ïohi beit ïa ka jingkmen ha ki khmat jong u, ka jingkmen ha ki khmat haba u lah ban ai skhim ïa ki skul lane ki shnong kaba ki donkam bad kine ki shon ha ka jingmut jingpyrkhat jong nga”.
U Conrad u ong ba u la bteng ban ïaid ha kane ka juh ka nongrim treikam, buh khmat ïa ka jingdonkam u paidbah halor ka jingïadei seng saiñ pyrthei. “Kumta, haduh mynta ngi dang ïaid beit da kane ka juh ka nongrim treikam,” u la ong.
Haba kubur ba bun ki briew na ka seng saiñ pyrthei ba synshar ki ju wan sha u, u Conrad u la bynrap “Hooid ki lah ban don ki khep ha kaba kin don bun ki briew ba wan ban ïakynduh kiba na ka seng saiñ pyrthei ba synshar hynrei kane ka dei kaba ju jia beit, to ngin ym kyntait ïa kane”.
“Ngam ju kylli la phi dei na ka NPP, pyni ïa nga ïa ka ID Card lane phi dei na kane ka seng saiñ pyrthei, em Sir. Ngi ïaid beit haba pynshong nongrim halor ki jingdonkam bad ka jingdonkam ki paidbah,” ong u Conrad.
U la kubur ba bun ki MLA ki ju ai skhim tang sha la ki jong ki briew bad ong “Ka saiñ pyrthei ka ïaid kumne ha man ki Jylla. Kam don jingleh bakla…Hynrei kam dei satia ka jingmut jong ngi ban leh kumta”.
Shuwa kane, u Myntri Rangbah u la kular ba ka jingpynkiew ïa ka pisa bala mang, kaba kot T.20 klur ka dei kaba la buh beit thik tang sha ki kam pynroi, khamtam na ka bynta ka Chief Minister Special Development Fund (CMSDF) bad Chief Minister Special Grant (CMSG).
“Kaba bun na ka pisa ba ngi pan ka dei na ka bynta u paidbah, ka dei na ka bynta ki kam pynroi,” ong u Conrad haba jubab ïa ka cut motion. U la pynshai ba ka jingpynkiew kam dei na ka bynta ban thied kali, haba pyntip ba ka CM Secretariat kam pat pynlut pisa satia ban thied kali thymmai.
“Ka CM Secretariat kam pat ju pynlut pisa ban thied kali. Ngim pat thied kali thymmai, ngi la pyndonkam ïa baroh ka pisa na ka bynta ki kam pynroi,” ong u Conrad.
