Shillong Rymphang 26
U Myntri Rangbah ka jylla u Conrad K Sangma u la pynrem jur ïa u National Secretary barim ka BJP Sunil Deodhar haba pyntip ba ka Sorkar kala shim ïa ki sienjam katkum ki kyndon aiñ pyrshah ïa une u briew halor ka jingkren bakla bad laplah, kaba ym lah ban pdiang satia.
“Nyngkong eh kum ka Sorkar ngi la kyrshan ïa baroh ki niam bad ki jaidbynriew bad ïa baroh ki kynhun ha ka imlang sahlang. Ïa kiba dang bat ïa ka Niam Tynrai, ngi la ai bun bah ki skhim haba ki la pynlong ïa ki prokram bapher bapher,” u la ong.
U Conrad u la ong, “Lada phi kylli ïa ki nongïalam ki jong ki seng Niam Tynrai, kin sa ïathuh ba kiba bun bah ki prokram bad ki skhim kila wan ha ka por jong kane ka Sorkar, la ka dei ka Cultural Centre ha Mawkhar, ka jingpyntrei ïa ki kam pynroi ha Smit ïa kaba nga dang shen nga la wan plie.”
U Conrad u la ong ba ki jingkren u Deodhar ki dei kiba bakla shibun bad kaba ïalam bakla. “Ka jingkren une u briew ka dei ka bym lah satia ban pdiang. Kine ki dei ki jingkren kiba kynshoit ïa u paidbah bad ba pyrshang ban pynïapait ïapra ïa ka imlang sahlang kaba ngim dei ban pdiang satia,” u la ong.
“Une u briew u hap ban pynbeit ne ban panmap na ki paidbah ka Jylla…Ngim lah satia ban pdiang ïa kane bad ka Sorkar kan sa shim ïa ki sienjam ba kongsan ban pynthikna ba ngim dei ban ailad ïa kum kine ki jait jingkren,” u la ong.
U Conrad u la pyntip ba u Symbud Myntri Rangbah ba khmih ïa ka tnad kam pohïing u la ïoh jingtip shaphang katei ka jingkren bad u la ïakren halor kane ka kam bad u la shim ruh ïa ki sienjam kiba dei ban shim namar ka hap ban ïaid katkum ki kyndon aiñ.
“Ki riewngeit Khristan kin bitar ïa kum katei ka jingkren hynrei kaei kaba ngi dei ban leh kum ki Khristan, ngi dei kiba ngeit ha ka jingïamap hynrei ngam ong, pat ba ngi dei ban klet bad ngam kwah ba na ka liang ka jong ngi ngin leh eiei,” u la ong.
