Shillong, Rymphang 26
U Moderator jong ka KJP Assembly, u Rev.WP Marbañiang ha ka 26 tarik u Rymphang 2026, u la plie paidbah ïa ka ophis treikam ba thymmai jong ka Khasi Jaiñtia Presbyterian Assembly kaba don ha IGP, Shillong.
La sdang ïa kane ka prokram da ka jingïaseng ba lyngkot, ba la pule bad duwai na u Tbn.W Lyngdoh bad kren pdiang na u Rev B.D Shangdiar, Secretary KJP Assembly.
Ha kane ka sngi la pule ruh ïa ka histori da u Rev.M Shylla , Sr.Administrative Secretary, ban pynsngew ba kumno la pynkynriah ïa ka ophis treikam na Mission sha IGP.
U Rev.M Shylla u la pyntip ruh ba kumba T.7,90,99,139 klur tyngka ka pisa la pynlut ban shna ïa kane ka ophis thymmai jong ka KJP Assembly.
Ban pynitynnad shuh-shuh ïa ka prokram ha kane ka sngi la ïoh ruh ka jingrwai ba kyrpang na ki nongtrei jong kane ka ophis.
U Moderator ka KJP Assembly, u Rev. WP Marbañiang u la plie ruh ïa u Mawnongrim.
Haba kren ha kane ka sngi na ka liang u Rev. WP Mawbañiang, Moderator u la ong ba kane ka ophis treikam ka long kum ka shyllang mat jong ka KJP Assembly hi baroh kawei.
U la ong ba kane ka dei ka sngi jong ka jingsah jingkynmaw na ka bynta ka histori jong ka Balang Presbyterian ha Ri Khasi bad Jaiñtia bad na bynta ki khun ki ksiew ha ki pateng.
U Moderator u la ainguh ïa u Blei nyngkong eh uba la isnei bad don ryngkat haduh ba la ïoh ban plie thymmai ïa kane ka ophis treikam jong ka KJP Assembly ban pyntyllun ïa ki kam.
“U Blei uba la isnei uba la don ryngkat bad ba la ïalam ïa ka Balang naduh ba la wan ka Gospel ha u snem 1841 kaba la jan dap ruh mynta kumba 185 snem. Ha kine ki snem kiba bun ka Balang ka la ïaid lyngba ki jingeh, ngi ïohi ïa ka jingjop jong ka Gospel ha ka ri Khasi bad Jaiñtia baroh kawei,” la bynrap u Moderator.
U la ong ruh ba mynshuwa ka ophis kaba don ha Mission ka long kaba khapngiah haduh katta-katta hynrei mynta kane ka ophis ba thymmai ka long shisha kaba kylluid.
