Washington, Rymphang:
U President ka United States, u Donald Trump, ha ka Sngi Ba-ar u la pynkup burom ia uwei u heh shipai, u Eric Slover, hapdeng ka jingai jingkren jong u ha ka ‘State of the Union’ bad kane ka jingpynkup burom jong u ia utei u heh shipai ka long halor ka jingtrei shitom jong u ha ka por leit khynra ka US ban ioh kem ia u nongialam ka Venezuela- u Nicolas Maduro bad la pynkup burom ia u da ka khusnam ‘Congressional Medal of Honor’ ban pynpaw ia ka jingsngewnguh halor ka jinglen lade jong u ha katei ka por ba ki bor pahara ka US ki leit ban khynra bad ha kaba, utei u shipai uba long u pilot, u la mynsaw ïalade ha katei ka jingleit khynra jong ka US.
U Slover u dei u nongñiah helicopter uba la mynsaw jur ha ka jinghiar thma jong ki shipai ha u bnai Jymmang kaba la pynlong ban kem ïa u nongïalam ka Venezuela u Nicolas Maduro.
“U Slover u la shah shoh jur bha ha ka kjat bad ka tyrpeng katba u dang pynkhreh ban hiar”, la ong u Trump bad bynrap ba wat la u la mynsaw, hynrei u Slover u la ïai bteng bad ïarap ban pynthikna ba ka mission kan long kaba jop, ong ka khubor.
“Ka jingjop jong ka mishon baroh kawei bad ka jingim jong ki para shipai jong u ka shong ha ka jinglah jong u Eric ban shim ia ka jingsngewsih kaba shyrkhei,” la ong u President.
U Slover u la wan shapoh kamra jong ka ïing ryngkat bad ka kurim jong u, ka Amy, da kaba pyndonkam ïa ka kor ïaid. U la ioh ia ka takma burom na u nongialam shipai ba kyrpang jong ka kynhun shipai Lt. Gen.
Ka Congress ka la ai ia ki ka jingkyrshan kaba ieng, ha kaba bun na ki nongsngap ki la pyrta wat “USA, USA, USA.”
Haba batai halor kane ka jingjia, u Trump u la ong ba u Slover u pynher ia ka lead helicopter kaba dei ka big twin rotor MH 47 Chinook. Katba ka liengsuin ka dang wan rung ban hiar, ki nongshun ki la sdang ban siat ia ka na ki liang bapher bapher. Kata ka jingsiat suloi kaba jur ka la siat ia ka liengsuin bad ka la siat ia u Slover ha ka kjat bad ka tyrpeng jong u kumba lai sien.
U Trump u la ong ba u Slover u la pynher ia ka helicopter hapoh ka jingsiat kaba jur jong ki nongshun bad u la pynim ia ka jingim jong ki para shipai jong u. “U Eric u la pynkhih ïa ka liengsuiñ jong u da baroh kita ki jingim bad ki mynsiem ban ïakhun pyrshah ïa u nongshun bad ailad ïa ki nongsiat suloi jong u ban pynduh ïa ka jingma, da kaba pynim ïa ki jingim jong ki para shipai jong u na kaei kaba lah ban long ka jingshah tynrah kaba shyrkhei ha ka jaka jong ki nongshun,” ong u Trump.
U President u la ong ruh ba sa shiphew ngut kiwei pat ki shipai kiba la ïashim bynta ha ka jingkhynra jong u Maduro ruh yn ithuh bad pynkup burom ha White House hadien.
