Shillong, Rymphang 26
U Symbud Myntri Rangbah ka Jylla Bah Prestone Tynsong uba khmih ruh ïa ka tnad Kam Pohïing ha ka sngi Palei u la pyntip ha ïingdorbar ba ka tnad pulit kala treikam tang 2823 ngut ki pulit pyrshah ïa ka jingdonkam bala mang kata 3,486 ngut bad 650 tylli ki kam kila lait thylli ha kylleng ki shnat treikam.
Haba jubab ha ïingdorbar, u Bah Prestone haba batai halor ki jingduna u la ong, ki police station ki don tang 1,431 ngut ki pulit na ka 1,843 tylli ki post kiba la mang, ha Outpost ki don 380 ngut na ka 503 ngut, ha ka Traffic Branch ki don 368 ngut na ka 439 ngut, ki CID ki don 107 ngut na ka 121 ngut bad ka Special Branch ka don 546 ngut na ka 580 ngut.
U la pynshai, ba ha Police Reserves, la shim haduh 859 ngut ki pulit na ka District Executive Force kumba ki donkam, ha kaba, kam shim la don kano kano ka jingmang katkum ka jingdonkam.
U MLA ka UDP na Mawsynram u Bah Olan Sing Suin u la kylli kumno ka Sorkar ka pyrkhat na ka bynta ban pyndap ïa kitei ki kam kiba thylli. U Bah Prestone u la jubab da kaba ong, “Ïa kane baroh yn sa shimkhia ha ka jingpynmih ïa ka jingpynbna ne Advertisement kaba thymmai.”
U MLA ka VPP u Bah Brightstarwell Marbaniang u la pynpaw ïa ka jingsngewkhia halor ka Meghalaya Police-Public Ratio, da kaba kdew ba ka Bureau of Police Research data kala buh ïa ka jylla ba ka don 455 ngut ki pulit na ka bynta shi lak ngut ka jingdon paid, haba ïanujor bad ka Nagaland kaba don 1,136 ngut ne ka Mizoram kaba don 568 ngut.
U Symbud Myntri Rangbah u la pynphai nia da kaba ong, ba ka ratio ba mynta jong ka Meghalaya ka long 197.65 bad kala lah ban pyndep ïa ki kyndon jong ka BPR&D.
“Haba ngi rai ban thaw ïa ki Police Station kiba thymmai, ngi da khmih bniah bha ba kan ïaid ryngkat bad ka jingthaw ïa ki post,” u la ong.
Halor ka jingkynnoh ba ki pulit kim shym la trei ïa ka kam ka jong ki, u Bah Brightstarwell u la ujor ba ki pulit langrut ne Constable kila shah pynngat kam ban trei ïa ki kam ïing kam sem ha ki jaka sah jong ki ophisar.
U Bah Prestone u la kubur ïa kane ka mat bad ong, “Lada don kino kino kiba pyndonkam bakla ïa ka bor na ka jingtrei ïa ka kam pulit sha ki kam ki bym dei ki kam pulit ban trei, ngan sa khmih bniah bad pynthikna ba kum kitei ki jingjia kim dei ban jia”.
Hadien ba u Bah Brightstarwell u la shimkhia bad ïai ban ïa kane ka mat, u Symbud Myntri Rangbah u la ong, “ngan sa shimkhia”.
U MLA ka NPP u Dr. Celestine Lyngdoh u la kyntu ban buh ïa ka Traffic Branch na ka bynta ka Umsning, da kaba pynpaw ba kala don ka jingdheng kali ha ka surok kaba 600-metre. U Bah Prestone u la ong, ba ïa kane ka mat yn sa khmih bniah thikna bad bynrap ba la buh ïa ki pulit Home Guards ha ki jaka kiba donkam bha kum ka sienjam kaba shipor.
Ha kaba ïadei bad kawei pat ka jingkylli, u la pynthikna ba ka Mawkroh Police Outpost ka dei kaba la treikam bha.
