Shillong, Rymphang 27
U Myntri Rangbah ka Jylla u Conrad K Sangma u la kaweh lama ban pyllait paidbah ïa ki 84 tylli ki bos ba kynthup 55 tylli ki ‘electric bus’ kiba dei hapoh jong ka PM eBus Sewa Scheme.
Ïa kane ka prokram pyllait ïa “Ka Bos Jong Ngi” kaba dei hapoh jong ka tnad Urban Affairs la pynlong ha phyllaw jong ka Meghalaya Legislative Assembly ba thymmai kaba don ha Mawdiangdiang Shillong.
Kine ki bos ba thymmai ki don ïa ki ‘air-conditioning’, ki jaka ban charge mobile, ‘Real Time Tracking System’ bad ka ‘e-ticketing facilities’ ban pynthikna ïa ka jingsuk, jingshngaiñ ka jingtreikam ba bha na ka bynta ki nongleit nongwan.
La sdang ban pynïaid ïa kine ki bos naduh hynne ka sngi kata na IIM Shillong sha Upper Shillong, ha kaba la buh ban ïaid man ka sngi naduh ka por 7:00 baje mynstep haduh ka por 9:00 baje mynmiet. La khmih lynti ba kane ka jingthmu ka dei ban pynbha ïa ka jingpynïasoh ha sor bad ban ai ïa ki nongshong shnong ïa ka leit ka wan kaba shaniah, kaba suk, bad kaba ïada ruh haba dei bad ka mei Mariang.
U Myntri Rangbah u la aiti ruh ïa ki hynñiew tylli ki kali die mar bam (food carts) sha ki nongïoh jingmyntoi lyngba ka Van Dhan Vikas Kendra (VDVK) kaba long kum shi bynta ban kyrshan ïa kiba trei ki kam barit bad ki nongseng kam seng jam ba ha ki shnong ki thaw.
Kane ka jingplie ïa kine ki bos ka long ka bynta ba kongsan haba ïadei ka jingpyrshang jong ka Sorkar ban pynsuk ïa ka leit ka wan jong ki paidbah, ha kajuh ka por ban thaw ka lad kamai bad ban kyntiew ïa ka jingroi hapoh sor.
