Shillong, Rymphang 27
Ka National People’s Youth Front (NPYF) Meghalaya kaba dei ka shnat treikam ki samla ka National People’s Party ha ka Jylla, ha 27 tarik u Rymphang, 2026, ka la pdiang burom ïa ka jingwan pynïasoh ka Samla Naphishisha Marweiñ, dkhot ka United Democratic Party (UDP) Shillong City ha ryngkat bad ki nongkyrshan jong ka.
Ïa kane ka jingïalang pdiang burom la pynlong ha ka ophis treikam jong ka party NPP ha ryngkat ka jingïadonlang u Myntri ka Sorkar Jylla, u Bah Wailadmiki Shylla, uba dei ruh u State President NPYF Meghalaya, u Bah Hamletson Dohling, Working President NPP, u Bah Himalaya M Shangpliang, nongaiktien ka NPP, u Bah Damanbait Lamare, MLA ka Umroi bad kiwei-kiwei de.
Lah ban kdew hangne ba ka Samla Naphishisha ka dei ruh kaba la ïa aireng ha ka ilekshon MDC sha KHADC ha u snem 2025, na Umroi Konstitwensi hynrei ka khlem lah ban poi sha ka thong.
Haba kren ha kane ka sngi ka Samla Naphishisha ka la ong ba ka jingsynshar ba shisha kam shong ha ka kyrdan hynrei ha ka jinglen ïalade.
“Haba nga phai sawdong ka Jylla nga ïohi ba shibun ki kam bah kiba ka NPP ka la leh. Shibun ki matti treikam kiba kane ka party ka la leh, shibun ki kam pynroi kiba ka la wanrah ha ki tnad treikam ki bapher-bapher,” la ong ka Samla Naphishisha haba ïathuh ïa ka daw ba ka la wan ban pynïasoh noh bad ka Party NPP.
Ka la kdew ruh ba lehse kin don bun ki ban kynthoh ne kynnoh, ban kdewkti bad ban beiñ ïa ka ba ka dei kaba kyntiap seng, “Hynrei haba nga mih ha ka jylli politik nga don ïa ka nongrim kaba skhem,” ka la ong.
“Nga don ruh ïa ka mynsiem ka jingsngewkhia na ka bynta ki para samla bad khamtam ki samla kiba don hapoh ka Konstitwensi jong ngi bad jong ka Jylla hi baroh kawei,” la bynrap ka Samla Naphishisha.
