Shillong, Rymphang 27
U Bah Lambokstarwell Marngar President ka Khasi Students’ Union (KSU) u la ong ba watla ka Sorkar Jylla ka la kam ba la dep pyntreikam ïa ka MRSSA-2016 hynrei ka buh ïa u dak jingkylli ba mynno bad haei la pyntreikam ïa ka.
“Haei kata ka aiñ kaba lah ban peitbniah bad bat ïa ka jingwan rung kyrthep ki briew kiba nabar sha ka Jylla jong ngi, hynrei la ïoh ban bat da kiba bun ki sengbhalang,” la ong u Bah Lambokstarwell haba kren sha ki lad pathai khubor ha ka sngi Thohdieng halor ka jingïoh kem ka seng man ka por ïa ki briew ba nabar.
U la ong ruh ba ka jingkam ka Sorkar Jylla ba la pyntreikam ïa ka MRSSA ha ka Jylla ka long ka bym lah ban pdiang bad ka dei tang ka jingïalam bakla.
“Ka Sorkar lada ka don ïa ka jingkut jingmut kam dei ban shu ong ba la pyntreikam ïa kita ki aiñ hynrei ngi dei ban ïohi ha madan ba kata ka aiñ la dep pyntreikam. Kano-kano ka aiñ kaba la ong ba la pyntreikam ngi dei ban ïohi ba ka don ka jingtalasi ha ki khyrdop hynrei haduh mynta ym shym la don ka jingtalasi ha ki khyrdop ïa ki briew ba wan rung sha ka Jylla jong ngi,” la ong u Bah Lambokstarwell.
U la ong ba lada ka Sorkar ka donkam ban pynkhlaiñ ïa kita ki aiñ balei pat kam leh ïa la ka jong ka kamram, da kaba kdew ruh ba ka jingdawa ïa kita ki aiñ ki kanun ban ïada kam shym la pat longdoh longsnam haduh mynta.
“Ka aiñ ba ka Sorkar ka la thaw hi ban long aiñ haduh mynta kam pat treikam, ngi khmih lynti ba kata ka ILP ba la dep mynjur naduh u snem 2019 ruh hynrei haduh mynta ka jubab jong ka Sorkar Pdeng ngim pat sngewthuh sngewthaw la ka long kumno bad man kumno,” la bynrap u Bah Lambokstarwell.
Namarkata, u ong ba watla hapdeng ka jingbym don kita ki aiñ ban pyntreikam hynrei kum ka seng ba don ïa ki shnat treikam bapher-bapher, ka la bthah ïa baroh ki dkhot ba kin bteng ka jingkhynra ïa ki bar jylla kiba shu wan rung beaiñ ha ka jylla.
Shuh shuh u Bah Lambokstarwell u la maham ïa baroh kiba don ha ka bor synshar ba ki paidbah ki phah ïa ki sha Ïingdorbar Thawaiñ ban shna ïa kita ki aiñ ban long ka jingïada ïa ka Jylla ym pat ban shu kren tang da ka ktien ba la leh, namar haduh mynta kawei ruh ka aiñ ym pat ïohi ba ka la treikam.
