Shillong, Rymphang 27
Da kaba buh hakhmat ïa ka kam pynmih jingbam ha ka Jylla ka S&E Ventures ka la ïasoi soskular bad ka Angie Shirhabs kaba la ïoh jingkyrshan na ka PRIME Meghalaya.
Kane ka jingsoi soskular kine ki ar tylli ki kompeni ka pynskhem ïa ka jingïatreilang ban shna ïa ki Ashar Dohsyiar (chicken pickle) ba khuid, ba bha bad kaba yn lah ban die pynïaid ïew hapoh jong ka Jylla bad shabar Jylla. Ïa ki ‘chicken pickle’ yn die hapoh ka shap “Hoi Kiw,” kaba dei ka kyntien Khasi kaba pynpaw ïa ka jingsarong bad ka jingthoh ïa ka kolshor da kaba thmu ban pynneh pynsah ïa ki rukom bam tynrai hynrei da kaba bud ryntih ïa ki kyndon ai jingïada bam.
Ka Angie Shirhabs kan shimti ïa ka bynta ban shna, da kaba bud ia ka rukom shet ba kyrpang, ka rukom song bad ki kyndon kiba ai jingïada halor ka bam ba la buh da ka S&E Ventures.
Kumba ka long mynta ha ïew, bun na ki ashar ba la pynmih ki dei ki bym don ïa ka lisen ne ki bym bud ïa ki kyndon ka FSSAI. Hynrei, ka “Hoi Kiw” ‘chicken pickle’ kan long kaba la bud pura ïa ki kyndon ka FSSAI, kaba la shna ha ka jaka kaba khuid bad kaba bud ryntih ïa ki kyndon, ban pynthikna ba ka dei kaba shngaiñ bad kaba lah ban bam da baroh.
Ha kane ka jingïasoi soskular, kine ki ar liang ki ban jur ïa ka jingbud ryntih ïa ki kyndon ka FSSAI, ka jingkhuid bad ka jingpeit bniah ïa ka jingbha jong ki mar bam. U ba mihkhmat na ka S&E Ventures u la ong ba kane ka jingïatreilang ka ïahap bad ka jingthmu jong ka kompeni ban pyndonkam ïa ki sap ki phong ban shna ïa ki mar bam kiba don ïa ka jinglong tynrai hynrei kiba bud pura ïa ki kyndon.
Kiba mihkhmat na ka Angie Shirhabs ki pynpaw ba kane ka jingïasoi kan ïarap ban kyntiew ïa ka jinglah ban shna, ban pynkhlaiñ ïa ka shap bad ruh ban thaw kam ha ka Jylla.
