Shillong, Rymphang 27
U President ka Voice of the People Party (VPP), u Bah Ardent Miller Basaïawmoit ha ka Sngi Thohdieng u la ong ba ka seng ka kyrmen skhem ban jop biang ïa ka shuki jong ka Shillong Parlia-mentary konstitwensi (Lok Sabha) ha kane ka ilekshon shiteng samoi ban wan.
“Ngim pat rai eiei (halor u kyrtong), hynrei shen ngin sa pyrkhat halor kane. Ngam dei…kam dei ba ngi sngew sarong ne kaba kum kata, hynrei ngi sngewthuh ïa ka lyer ba beh jong u paidbah ba ngin ïai bat biang ïa kane ka konstitwensi bad ngi,” la ong u Bah Ardent.
Une u khlieh nongïalam ka VPP u la ong ba ka seng kam donkam ïa ki briew ba nabar ban jop ïa ka ilekshon shiteng samoi haba jubab halor ki jingïakren shane-shatai.
“Nga ong ïa phi, ngi don ki briew kiba biang ha ka seng, kiba la tbit, kiba sngewthuh ïa ka tynrai jong ka jinglong-jingman, ïa ka jingsdang jong ka seng. Ngam tharai ba ngi donkam ïa ki briew ba nabar jong ka seng ban ïakhun ha kane ka ilekshon,” u la ong.
Kumban shu kdew hangne, ka Jylla kan sa ïoh ïa ka ilekshon shiteng samoi namar ka jingkhlad noh ba kyndit jong u MP ka Shillong, u Dr. Ricky A.J. Syngkon ha ka 19 tarik u Rymphang.
