Shillong, Rymphang 27
U Bah Prestone Tynsong u Symbud Myntri Rang-bah ba khmih ïa ka tnad kam Pohïing (Police) u la pynpaw ba ka Sorkar ka long kaba la kloi ban pynlong ïa ka jingïakren ïasuk bad ka Hynñiew-trep National Liberation Council (HNLC) hynrei ka jingkitkhlieh ka shong ha kane ka seng ban shim ïa ka sienjam.
“Ka jingkhang sha ka jingïakren ïasuk ka dang plie la ka dei na ka Sorkar India lane na ka Sorkar Jylla. Ka rai hi ka shong ha ki. Lada ki rai, ngin pynsdang biang ïa ka jingïakren hynrei lada kim rai, ngim lah ban ong ei-ei ïa kata,” la ong u Bah Prestone hadien ka jingwan pyndem noh uwei u dkhot ka HNLC ha Mairang.
U Bah Prestone ula kyntu ruh ïa kiwei ki dkhot ka HNLC ba kin bud ïa ki sienjam jong une u dkhot ba la wan pyndem bad ban wan im lang noh ha ka imlang sahlang.
“Ka jingkyntu jong nga sha kiwei ki dkhot ka long ba kin bud ïa kajuh ka dienjat bad wan noh sha ka imlang sahlang” u la ong.
Haba kren halor ki daw ka jingwan pyndem, u Bah Prestone ula ong “Ki don bun ki daw, haba kut hi, namar ka jinglong samla, phi pyrkhat bha bad phin ong “Nga hap ban wan phai noh sha ka imlang sahlang”.
U Symbud Myntri Rangbah ula kular ruh ban ai jingïada bad ka jingkyrshan ïa kito kiba wan ban pyndem wait.
“Ngi don hangne, ka Sorkar ka don hangne ban ïarap ïa phi, shisien ba phi la wanphai, phin ïoh ïa ka jingïada ba pura” ong u Bah Prestone haba ban jur ïa ka jingthmu hok jong ka Sorkar ban pynshlur ïa ki dkhot ka HNLC ba kin wan phai noh sha ka imlang sahlang.
Haba kylli la kin dang don ki ban wan pyndem, u Bah Prestone ula ong “Ngam lah ban ong ei-ei halor kata” haba kyntait ruh ban kynthoh ei-ei halor ka jingkhlaiñ bor ka HNLC da kaba ong ba ïa ki jingtip ba bniah lah ban ïoh na ka Police Headquarter.
