Shillong, Rymphang 27
U Lamphang jong ka ïingdorbar thawaiñ ka Jylla u Thomas A Sangma u la ong ba ki jingtei ïa ka Assembly ba thymmai ki long ki ba ïaid beit haduh mynta bad pynpaw ba ka dei ka por kaba eh bha namar hap ban pyndep ïa ka jingtei ïa ka jaka ban shong dorbar hapoh jong u bnai Jylliew ne Naitung namar kan don ka Dorbar kaba bud ka ban long ha u bnai Nailar kumta donkam ban pyndep ïa ka shwa jong kata.
Ïa kane u Lamphang u la ïathuh ha ka jingïakren bad ki nongthoh khubor ha ka por ba ka tnad Urban Affairs ka dang pynlong ïa ka jingjurip ïa ki jingtrei kiba don ha New Shillong Township bad ha ka jingleit ban jurip ïa ka Assembly ba thymmai kaba don ha Mawdiangdiang Shillong.
Haba ïadei ban kham pynkloi ban pynsted khnang ban lah pyndep kloi ïa ka jingpyntrei ïa ka Assembly ba thymmai, u Lamphang u la ong ba la bthah ïa u kontraktor ba un trei baroh shisngi khnang ban lah ban pyndep kloi katba lah.
Haba jubab ïa ki jingkylli u la ïathuh ba ïa ka bynta ba shapoh jong ka Assembly la aiti sha ka PWD bad ka kam ka dang ïaid shakhmat, ïa ki tiar la shna shabar jong ka Jylla hynrei ki la don lypa ha lynti bad la khmih lynti ba ki tiar kin poi ha u bnai ban wan.
“Kine ki jingshna ba hapoh ki kynthup kum ki audio lane visual, ki light, ki data cable bad kiwei. Te kumta ngi la pyndonkam ruh da ki kompeni na US kiba la ju trei ha ka ïingdorbar thawaiñ ka ri.”
Haba bynrap u la ong ba kane ka Assembly ba thymmai ka don ïa ka jaka kaba biang ban pdiang ïa baroh.
