Shillong, Rymphang 27
U Myntri ka Koit ka Khiah, u Bah Wailadmiki Shylla haba kren hapoh Ïingdorbar ha ka Sngi Thohdieng u la ong ba ka jingsiew kaba palat T.11.36 klur la siew hapoh ka Megha Health Insurance Scheme (MHIS) na ka bynta ka jingsumar ‘Dialysis’.
U la ong ba ka tnad ka “pyrshang ïa kaba bha tam” ban pynkhlaiñ ïa ki jingshakri, da kaba kdew ba ïa ka ‘Dialysis’ la dep ban kynthup hapoh ka MHIS.
Kane ka jubab ka long hadien ka jingsngewkhia ba la pynpaw da u nongïalam ka VPP, u Bah Ardent Miller Basaïawmoit halor ki nongpang kiba duna ka ïoh ka kot kiba shah pynbor ban wad jingsumar ha ki jaka sumar shimet kiba rem dor.
“Ngim lah ban khmih lynti ba ki nongpang kiba duna ka ïoh ka kot kin leit sha ki ‘hospital’ shimet”, la ong u Bah Basaïawmoit haba kyntu ïa ka Sorkar ban buh ïa ki doktor ‘Nephrologist’.
U Bah Wailad u la ong ba ki ‘hospital’ Sorkar ha ki distrik ki shim T.3 hajar shi syn leh ïa ka ‘Dialysis’, ha kaba ïa ki jinglut-jingsep la kynthup hapoh ka MHIS, katba ïa ki ‘hospital’ shimet ruh la pynrung lang ha ka thup.
“Ki doktor dawai (Medicine) ki peit ïa kane ka jingsumar ha ka jaka jong ki ‘Nephrologist’,” u la ong da kaba bynrap ba u don tang uwei u ‘Nephrologist’ ha ka Jylla namarba duna ki nongaplai.
Haba u Nongïalam ka Liang Pyrshah, u Dr. Mukul Sangma u la ban jur na bynta ka jingïoh jingsumar kaba kham ïar, u Bah Wailad u la ong ba ka Sorkar “kan wad ki lad ki lynti” ban pynlong ïa ka jingsumar kaba kham jem dor. Halor ka jingpynslem, u la ong ba ka jingdon jong ki nongpang ka la nang kiew bad ka tnad ka dang trei ban pynbun ïa ki mashin bad ki nongtrei kumjuh.
Ka Jylla mynta ka don 54 tylli ki mashin ‘Dialysis’ ha East Khasi Hills-12 tylli ha Shillong Civil Hospital (10 tylli kiba treikam) bad 42 tylli ha ki ‘hospital’ shimet.
Shuh shuh u Bah Wailad u la pynbna ïa ka jingthmu ban pynïar ïa ki ‘Dialysis Unit’ sha baroh ki ‘hospital’ jong ki distrik bad wat sha ki CHC.
