Shillong, Rymphang 27
U dkhot ka seng kieng-atiar ka Hynñiewtrep National Liberation Council (HNLC) u la wan pyndem ïalade hakhmat ki pulit ha Mairang, Eastern West Khasi Hills District ha ka sngi Balang.
Une u dkhot ka HNLC u dei ïa uba la tip kyrteng u Samuel Wahlang Pahsyntiew uba dei na Umpohwin kaba hap ha Mawlasnai Outpost Ri-Bhoi District.
Ka ophis ka Director General of Police ka la pyntip ba u Samuel Wahlang u la wan pyndem ïalade ha ka 25 tarik u Rymphang 2025, ha u Superintendent of Police ka Eastern West Khasi Hills District, Mairang ha ka jingsynran lang ki bahaïing hasem jong u bad ki bor pynïaid shnong.
La pyntip ba une u dkhot ka HNLC u dei ruh uba la suba donkti ha ka jingpynbthei bom IED ha jaka ïeng kali hajan Them Metor, Iew Mawlong myn ha ka 09 tarik u Lber 2024 bad kumjuh ruh u donkti ha kiwei pat ki kam pynbthei bom ha kine ki khyndiat snem ba la dep.
Ha ka jingtohkit ïa u, u la phla ba ma u bad kiwei pat ki para dkhot ka HNLC ba sah ha Bangladesh ki la donkti ha ka ban pynbiej ïa ki samla ban rung dkhot sha kane ka seng lehnoh ha kine ki 2 snem ba la dep.
Halor kane ka jingphla jong u, ki pulit ki la pynrung mukotduma hapoh ka BNS bad sa 2 ngut kiwei pat ki dkhot jong kane ka seng kiengatiar kiba donkti lang ban pynrung dkhot ïa ki samla bad donkti ban buh bom IED ha ka ïew ha Umsning ha ka 12 tarik u Risaw 2025, ki la shah kem na Umsning, bad ka jingtohkit ïa kine ka dangïaid shakhmat katkum ka aiñ.
