Nongstoiñ, Rymphang 27
Ka Catholic Association jong ka Nongstoiñ Diocese ha ka Sngi Thohdieng jong ka taïew ka la pynpaw ïa ka jingsngewkhia kaba jur halor ka jingkren bym don jingkitkhlieh jong u Sunil Deodhar uba dei u nongïalam ka seng BJP da kaba kren tohmet ïa ki Balang Khristan hapoh ka Jylla.
U Bah Witting Mawsor, President ka Catholic Association Nongstoiñ Diocese (CAND), ha ka jingdonlang u Bah Julius Nongdhar, General Secretary ka Seng Rangbah Catholic Nongstoiñ Diocese, u Bah Bornard Syiemiong, General Secretary ka Catholic Association Nongstoiñ Diocese, u Bah Nerius Syiemlieh bad kiwei pat ki dkhot jong ka seng haba kren ha ki lad pathai khubor halor kane ka bynta u la ong ba kum ka Catholic Association jong ka Nongstoiñ Diocese ka pynpaw ïa ka jingbym lah ban pdiang ïa ka jingkren bym kitkhlieh bad kren tohmet ïa ki Balang Khristan ha kane ka Ri Khasi ha kaba u la kynthoh ruh ïa kiei-kiei ïa ki bym lah ban pdiang ha ka jaidbynriew hi baroh kawei.
“Na ka liang jong ngi kum ki Khristan ngim shym la don kano-kano ka jingpynbor ban pynkylla Khristan, hynrei kane ka jingkren ka jong u ka pynrung ïa u symbai jong ka jingïapait ïapra hapdeng jong ngi ki jaidbynriew Khasi ” ong u Bah Witting da kaba u la bynrap ruh ban ong ba “Ngi ki jaidbynriew Khasi-Pnar ha kane ka Ri Khasi, ngi shong suk shong saiñ naduh mynor bad ngim don ki jingïa pait ïapra, ka jingïakynad ha ka kyrteng jong ka niam hynrei ngi long kawei, ngi long shitylli, ngi long shipara, hynrei ka jingkren jong une u rangbah ka pynrung ïa u symbai jong ka jingïapait ïapra bad ban pynrung khamtam eh ïa ki samla kiba dang khie kiba dang san ïa ki khyllung ïa ki khynnah ki bym pat tip ïa ka bneng ka khyndew.”
Shuh shuh u la ong ruh ba lehse suki suki ka jingkren jong kine ki briew kiba wan na shabar ban pynpait pynpra ïa ka jaitbynriew ka jong ngi suki suki kine ki khun samla ki hep kiba rit kiba dang khie dang san ki heh ki san ïa kane ka jingpynsngew jong ki briew kiba nabar ki bym don ka jingkitkhkieh kiba shu wan bad ïalade ki phet noh sha jngai hynrei ka ïing ka sem ka jong ngi kan sa ing.
Kumta na ka liang ka Catholic Association Nongstoiñ Diocese ka pynpaw ïa ka jingbym lah ban pdiang ïa kane ka jingbym don jingkitkhlieh jong une u rangbah bad ong “Ngi pynrem jur ruh ïa ka jingkren ka jong u namar ha kane ka Jylla ym don kaba kum kita.”
Halor ka jingkynnoh ba lada donkam ïa ki surok, ki skul, bording bad kiwei-kiwei ki lad pynroi ha kane ka Jylla, dei ban kylla Khristan shuwa nangta sa ai, u Bah Witting u la ong ba kum kata ym don ha kane ka Ri Khasi-Pnar hynrei ki kam pynroi haba ai la ai ïa baroh, ym tang na ka bynta kano-kano ka Balang lane kino-kino ki niam hynrei ki lad pynroi ka Sorkar ki ai ïa baroh.
