Shillong, Rymphang 27
U Symbud Myntri Rangbah ka Jylla, u Bah Sniawbhalang Dhar ha ka Sngi Thohdieng u la wanrah da ka ‘Point of Order’ pyrshah ïa ka jingkdew jong u nong-ïalam ka VPP, u Bah Ardent Miller Basaïaw-moit tang ïa ka kyntien “Khasi” ha ka jingïatai kaba la long ha ka 25 tarik u Rymphang haba ïadei bad ka kaiphod jong ka ‘Expert Com-mittee’ halor ka ‘State Reservation Policy’.
U Lamphang u la rai ba ka jingbuh jingthoh ba tikna ka dei ban pynneh ïa ka kyntien “Khasi bad Jaiñtia.”
“Nga wanrah ïa ka ‘Point of Order’ halor ka jingkren jong u dkhot na Nongkrem…u dkhot u kdew ïa ka kyntien ‘Khasi’ bad ym shym la kynthup lang ïa ka Jaiñtia. Kumba baroh ngi tip ba katkum ka ‘Reservation Policy’, la buh kyrpang ïa ki Khasi bad Jaiñtia”, la ong u Bah Dhar, da kaba kyntu ïa u Lamphang ban buh ha ka jingthoh ba dei ban pyndonkam beit ïa ka kyntien Khasi-Jaiñtia.
Na ka liang u Bah Basaïawmoit u ïada ïa ka jingjied kyntien jong u.
“Nga khmih lynti ba u Symbud Myntri Rangbah ba un long rangbah ban sngewthuh haba nga ong ki Khasi, nga tip kiei ki Khasi…nga ju pyndonkam beit ïa ka kyntien ‘Khasi’ namar nga kwah ban pynïatylli ïa ka jaidbynriew…ngi long kawei kum ka imlang-sahlang bad ngi long kawei kum ka jaidbynriew,” u la ong da kaba bynrap ba um shym la don ïa ka jingthmu kaba sniew bad um shym la khmih lynti ïa u Myntri ba un rah ïa kane hapoh Ïingdorbar.
Haba bynrap ïa u Bah Dhar, u Myntri ka koit ka khiah, u Bah Wailadmiki Shylla u la kdew ba ka jingpybna jong u snem 1972 ka la kdew shai ïa ka “Khasi bad Jaiñtia.”
“Ngi don hangne ym ban kdew kti…kaei-kaei kaba la ïakren kan sah ha ka jinglum thup…ngi kwah tang (ban pynbeit ïa kane), ngim kwah ban ïapait-ïapra”, u la ong.
U Bah Basaïawmoit u la ban biang ba u la pyndonkam ïa ka kyntien ‘Khasi’ da kaba thmu ban khanglad ïa ki bor ba nabar ban phiah ïa ka jaidbynriew.
Haba ai ïa ka rai, u Lamphang, u Thomas A. Sangma u la ong, “Kumba la buh ha ka jingthoh, la ju kdew kum ka Khasi bad Jaiñtia, kumta nga pynbeit ïa kane.”
