Khliehriat, Rymphang 27
Ki pulit ka East Jaiñtia Hills ha ka 25 tarik Rymphang ki la ïoh ban sei noh ïa ka metïap jong uwei u rangbah u bym lah ban ithuh kaba per halor jong ka Wah Umsuwai, East Jaiñtia Hills District.
U Superintendent of Police u la ong ba hadien ki la ïoh ïa ka jingtip lyngba u Waheh Shnong jong ka shnong Moolamanoh ba ka don kawei ka metïap kaba per ha Wah Umsuwai, kumta na ka liang ki pulit ki la leit bran-bran sha katei ka jaka ban pynlong ïa ka jingtohkit bniah.
Ha kaba sdang jong ka jingtohkit, ïa kane ka metïap ym shym la don satia kino-kino ki ban wan kam, bad hadien ba la pyndep ïa baroh ki jingdonkam ha katei hi ka jaka, la pynkynriah noh ïa ka met shapoh Civil Hospital Khliehriat na ka bynta ban leh ïa ka ‘Post Mortem’ bad ban buh hapoh ka jaka buh metïap jong ka ‘hospital’ khnang ban lap ïa ka daw jong ka jingïap.
Une u briew bym lah ban ithuh u dei uba la don ha ka rta 45-50 snem, u don ka rynïeng kaba 5.3 phut, uba kham dum sniehdoh, u phong da ka patlun ïong bad ka ‘t-shirt’ rong blu.
