Itanagar, Rymphang:
Kumba la sakhi, la ong ba ka seng Regional Arunachal Democratic Party (ADP) ka la mad ïa ka jingeh kaba khraw hadien ba 13 ngut ki dkhot ba kongsan jong ka ba la ïalam da u President u Tami Pangu ki la pynïasoh sha ka seng Congress, ïa kiba la pdiang sngewbha da u President ka APCC u Bosiram Siram ha Rajiv Gandhi Bhawan hangne ha ka lah sngi U Blei.
Ka Arunachal Democratic Party (ADP) ha ka lah sngi U Blei, 23 tarik, Rymphang, ka la pynïasoh bad ka Indian National Congress (INC), ha kaba baroh ki nongkitkam bad ki dkhot jong ka, ki la pynïasoh sha katei ka seng, ha ka jingïalang pynrung dkhot, kaba la long ha Itanagar.
U Pangu u la ong ba ïa kane ka jingpynïasoh la ïalam da ka jingsngewskhem bad jingngeit ha ka jingmut jingpyrkhat ha ka jingkular jong ka Congress ïa ka synshar paidbah, ka jinglong niam bad ki jinglong ba kongsan jong ka Riti synshar ka ri. Hynrei katei ka jingpynkylla kan ym ktah ïa ka jingkhlaiñ jong ka Congress ha ka ïingdorbar jong ka Arunachal Pradesh, namar ba ka ADP kam shym la don nongmihkhmat ha ka ïingdorbar. Ka Congress mynta ka don tang uwei u dkhot ha ka ïingdorbar thawaiñ.
Ïa ki dkhot ka ADP la pdiang sngewbha sha ka seng da u President ka Arunachal Pradesh Congress Committee (APCC) u Bosiram Siram ha ka jingïadon lang ki heh nongïalam jong ka seng Congress ha ka jylla bad ki nongbud jong ka seng.
U Siram u la pynthikna ïa ki nongïalam barim jong ka ADP ba kin don “ka jingkitkhlieh bad ka lad kaba mar katjuh” hapoh ka jinglong jong ka seng. Haba batai ïa katei ka rai, u Pangu u la ong ba katei ka sienjam kam dei tang ka jingkylla ha ka sain pyrthei hynrei ka dei ka jingpynïadei jingmut ban ïada ïa ki tnad synshar paidbah bad ban pynkhlain ïa ka jingsynshar katkum ka Riti synshar.”
U la bynrap ruh ba hapoh ka rynsan jong ka Congress, kin dang ïai bteng ban rah ïa ki mat ba kongsan jong ka jylla, kynthup ïa ka jingbishar bniah ïa ka Article 371(H), ki jingsngewkhia halor ki projek pynmih bording bad ki jingkynnoh tih marpoh khyndew beaiñ.
Ki nongïalam ki la pynpaw ruh ïa ki jingeh kiba kham ktah kum ka jingbym donkam-donjam, ka jingkiew dor, ka jingbamsap bad ki jaka treikam kiba nang tlot, da kaba khot ban pynbeit kyrkieh ïa ki lad ki lynti.
U Pangu u la ai khublei ïa u Myntri Rangbah barim ka jylla u Gegong Apang uba la ai ïa ki ïa ka rynsan jong ka seng Congress.
Ki nongïalam ki la pynpaw ïa ka jingïaroh ïa u President jong ka AICC u Mallikarjun Kharge bad ïa u nongïalam ka Liang Pyrshah u Rahul Gandhi, da kaba ai burom ïa ka jinglong nongïalam jong u Siram bad ka jingpyrshah jong u ïa ka Bharatiya Janata Party kaba synshar ha kane ka jylla kum ki daw kiba la pynlong ïa ki ban ai ïa kane ka rai.
Haba batai ïa ka jingpynrung paidbah kum ka “lynnong thymmai” ha ka saiñ pyrthei jong ki jylla, ki dkhot kiba dang shu rung thymmai ki la kular ban trei na ka bynta ka jingsynshar kaba pynshong nongrim ha ki paidbah, ka jinglong khuid bad ka roi ka par kaba kynthup lang ïa baroh ha Arunachal Pradesh.
