Shillong, Rymphang 27
U Bah Lambokstarwell Marngar, President ka Khasi Students’ Union (KSU) u la ther tyngeh ïa u Sunil Deodhar da kaba ong “Wat wan mushlia ïa ka jaitbynriew jong ngi, namar ka seng kam lah hi ruh ban shu sngap”.
Kane ka jingkren u Bah Lambokstarwell Marngar ka dei hadien ba u Sunil Deodhar u wei na ki dkhot ka BJP u la kren laplah bad kren beiñ ruh ïa ka niam Khristan ha kine ki taïew ba la dep ha kawei ka jingïalang kaba la long ha Pynter, ha kaba kane ka jingkren jong u ka la saphriang ha ki rynsan social media bad kaba la pynbitar lut ïa ki paidbah nongshong shnong.
U Bah Lambokstarwell Marngar u la kyntu ruh ïa ki paradoh parasnam ba “Ngim dei ban ailad ïa kum kita ki jingpyrkhat jong kiba nabar ba kin rung sha ka jingmut jingpyrkhat jong ngi”.
Namarkata, u ong “Ngin nym ailad ïa kum kine ki briew kiba wan ban pynsngewthuh bakla bad khamtam ban pynpharia ïa ka jaitbynriew jong ngi.”
Shuh shuh u la ong ba kine ki briew ki sdang ban pharia ïa ka jaitbynriew lyngba ka niam. Ka jaitbynriew ka dei hi ka jaitbynriew lada phi long niam ha kano-kano ruh bad ka KSU kam ju kren shaphang ka niam hynrei ka kren shaphang ka jaitbynriew.
