Shillong, Lber 01
U MLA ka North Shillong Constituency u Bah Adelbert Nongrum u la pynpaw ïa ka jingbym hun bad bym shaniah ïa ka kaiphod Reservesion Policy ba la wanrah ka Sorkar Jylla ba la phah da ka Expert Committee.
Haba kren sha ki nongthoh khubor ha ka sngi Saitjaiñ u Bah Adelbert u la pynpaw ba hadien ba u la dep ban pule bniah ïa kane ka kaiphot jong ka Expert Committee kaba dei halor ka Reservation Policy, u la lap ba ki don ki bynta ba khlem ai jinghun ïa u bad ba um sngewlah ban shaniah.
U la ong ba ka State Reservation Policy 1972 ka dei kaba la slem bad kaba ym ïahap shuh ha ka por ba mynta bad la donkam ban peit bniah lane ban pynkylla noh ïa ka, ka Sorkar ka la thaw ïa ka Committee kyrpang kaba la shong bishar ar snem, u la pynpaw ba ka jingkhmih lynti ka long ba kane ka Committee kan ai ïa ka jubab kaba bha, hynrei la shem ba kane ka kaiphod kam long kaba ai jinghun.
U la ïathuh ba ki don haduh 547 tylli ki jingai jingmut sha Expert Committee, na kine 105 kiba la leit ban ai jingpynsngew markhmat sha Committee katba ki 442 ki dei kiba phah ïa ki jingai jingmut jongki sha ka Committee lyngba ka shithi lane lyngba ka E-mail.
Shuh-shuh u la ïathuh ba ha Part 3, Volume 13 naduh ka sla 2608 haduh ka sla 2625 jong ka kaiphod ka pynshai ïa ki kyrteng, ki jingai jingmut bad baroh ki jingshisha jong ki nongai jingmut, ha kaba u la pynpaw ba u la lap ba kitei kiba ai jingmut kim don ïa ki jingdonkam, kum ki kyrteng, E-mail address, ki Mobile phone bad kumta ter-ter.
U la ïathuh ba ha ka jingbishar bniah jong u ïa ka kaiphod ha ka Part 3, Volumes 14, 15 bad 16 jong ka kaiphod la lap ba ki don haduh 260 tylli ki jingai jingmut ki long ïasyriem kumjuh bad ki don jingïadei na ba sdang haduh ba kut (duplicate submission) bad kim don ïa ki jingpynshisha katkum ba la bthah ka Committee, namar kata u la ong ba kumno yn lah ban shaniah ïa kane ka jingwanrah kaiphod jong ka Sorkar.
U Bah Adelbert u la kdew ba ka Part 4, Volume 19 ha ka sla ba 4110 jong ka kaiphod ka ong ba ka ‘Reservation’ kam dei ban ïaid katkum ka jingbun paid, hynrei haba ha ka Reservation 1972 ka ong ba dei ban ïaid katkum ka jingbun paid.
Haba bynrap u la ong ba ka kaiphot jong ka Expert Committee ka la pynkylla khongpong ïa ka jingai jingmut jongu, kaba pynpaw ha ka kaiphod ba “u Bah Adelbert nongrum um kwah ïa ka jingkylla bad namar kata nga ngam lah ban shaniah bad ngam sngewhun ïa ka kaiphod ba la wanrah da ka Sorkar.”
