Shillong, Lber 01
U Symbud Myntri Rangbah ka Jylla ka tnad kam pohïing, Bah Prestone Tynsong u la pyntikna ïa ka Ïingdorbar ba ka jinglong khuid ka dei ka bynta kaba kongsan tam ha ka jingpynrung kam pulit ba dang shen, ha kaba ka rukom treikam ka ïaid beit ïaid ryntih khlem kano-kano ka jingujor haduh kine ki sngi.
Haba jubab ïa ka ‘Cut Motion’ ha ka Sngi Thohdieng, u Bah Tynsong u la ong, “Ka jinglong khuid ka dei ka kyndon kaba kongsan tam jong ka tnad…la pyni shai ruh ïa ka PET bad ïa ki ‘mark’ ba la dep ban thoh.”
Ha kawei ka liang, u la batai ba ym shym la pynpaw ïa ki ‘mark’ jong ka ‘Interview’ ban pynneh ïa ka ‘Privacy’, hynrei ki kyrtong ki lah ban peit ïa ka kyrdan ba pura jong ki lyngba ka ‘online’ lane lyngba ka jingujor sha ka Board.
Halor ka rta thung kam, u Bah Tynsong u la ong ba ka OM jong u snem 2023 ka don hadien ba la ïamir jingmut, khlem da ïoh kino-kino ka jingujor haduh mynta.
“Ka rukom treikam ba la pdiang ka long kaba itynnad, ym don jingeh mynta…ka jinglong khuid ka dei ka sobjek bym don jingïapeiñ jong ka Sorkar,” u la bynrap.
U Bah Tynsong u la pyntikna ruh ba ka jingpynrung kam kaba hadien kan sa sdang noh shen na ka bynta ban pyndap ïa palat 1050 tylli ki kam kiba lait.
“Nga pyntikna sha ka Ïingdorbar ba ka jingpynrung kam kaba hadien, kaba don kumba palat 1050 tylli ki kam kiba lait, kan sdang ban treikam mardor hadien ba la pyndep ïa ka jingpynrung kam kaba mynta ha ka 5 tarik u Lber. Nga la bthah ïa ka Board ban sdang ïa ka jingpynrung kam bathymmai khnang ba lah ban pynbun bad pynkhlaiñ katba lah ïa ka tnad pulit,” u la ong.
Halor ka jingpynroi ïa ki jingtei, u la ong, “Kane ka mat ka long kaba kongsan bha; lada phi kwah ban ai ïa ka jingshakri pulit kaba kham bha, ngi donkam ïa kine ki jingtei. Ngi ïai leh ïa kata namarba ka shong ha ka jingdon pisa. Ngi pyrshang katba lah ban pyntikna ba ki jingtei haduh ka thanad bad ‘Police Outpost’ ki don na ka bynta ka jingtreikam kaba bha jong ka tnad pulit ha kine ki jaka.”
Shuh shuh u la kular ban pynbun ïa ka jingdon ki pulit kynthei da kaba ong, “Hooid, ngi don shisha ka jingeh haba ïadei bad ka jingduna nongtrei haba phai sha ki pulit kynthei – ngan pyrshang katba lah ban pyntikna ba ki pulit kynthei kin don ha baroh ki jaka ba la buh kyrpang.”
Na ka liang u Symbud Myntri Rangbah u la pyntikna shuh ban pynkhlaiñ ïa ki ‘Cybercrime Unit’, ha ryngkat u SP uba pura u ban peit ïa ka tnad.
