Nongpoh, Lber 01
Ha kawei ka jingjia kaba sngewtriem mynta ka janmiet Sngi U Blei, kawei ka longkmie ka la duh noh la ka jingim hadien ba ka la shah ïuh na ki bynta jong ka khlieh ha kawei ka kali ha surokbah National Highway-6 kaba dang hap ha 12 Mer, mar pyrshah bad ka CTI Byrnihat ha Ri-Bhoi District.
Katkum ka tyllong khubor ba la ïoh lum, la ïathuh ba kane ka la jia ha ka por 3:30 janmiet ha kaba katei ka longkmie kaba la tip kyrteng kum ka Absana Khatun (27 snem ka rta) na ka shnong Dharamyila, Dalgoan Sialmari jong ka Darrang District ka Jylla Assam ka la shah ïuh ha kawei ka kali ka bym lah satia ban tip kat haduh ba kan khlad syndon ha shen.
La ïathuh ruh ba katei ka kali tang mar ïa dep ïuh ia katei ka longkmie, ka la phet bak na katei ka jaka. Ïa ka met kaba sah jong katei ka longkmie la pynkit noh sha Nongpoh Civil Hospital na ka bynta ban pyndep ïa ki jingdonkam katkum ki kyndon jong ka aiñ bad na ka liang ki pulit ka Byrnihat Police Station ki dang pynlong ïa ka jingtohkit halor kane ka jingjia.
