Shillong, Lber 01
U President ka Khasi Students’ Union (KSU), u Bah Lambokstarwell Marngar, u la kynthoh tyngeh ïa ka Sorkar Jylla da kaba ong ba ka shu pynmih tang ïa ki kyrteng aiñ kiba ym treikam ei-ei.
Haba kren sha ki lad pathai khubor u Bah Lambokstarwell u la kdew ba ym don aiñ ha ka Jylla ban pyntreikam bad ban khanglad ïa ka jingrung beaiñ ki briew kiba nabar.
U la ong ba ka Meghalaya Residents Safety and Security Act (MRSSA) ka la mih ha ka por ka Sorkar jong u Dr. Mukul Sangma, namar ba ki ong ba kim lah ban pyntreikam ïa ka Inner Line Permit (ILP).
“Kane ka aiñ ka thmu ban shna ïa ki khyrdop bishar (check-gates) bad ban kynthup ïa ki Dorbar Shnong, hynrei haduh mynta ym pat lah ban pyntreikam ïa ka,” u la ong.
U la pynkynmaw ruh ba ha u snem 2019, ka Dorbar Thawaiñ ka la pass ïa ka resolution ban dawa pyntreikam ïa ka ILP, hynrei haduh mynta ka dang sah ha ka jingbishar jong ka Sorkar Pdeng bad ym pat don kano-kano ka jingshimkhia kaba pynthikna na ka Sorkar Pdeng halor ka ILP.
“Mynta ha u snem 2026, ka Sorkar ka la sdang ban ïakren pat sa halor ka “ILP-Like” system. U Bah Lambokstarwell u ong ba ka KSU kam sngewthuh shuh ïa kane ka jingpynkylla kyrteng man ka por.
U Bah Lambokstarwell u la kynnoh ruh ba kane ka dei tang ka jinglong “thamula” lane ka jingpynbieit ïa u paidbah.
Shuh shuh u la ong ba lada ka Sorkar ka kwah ban pyntreikam hok ïa ka aiñ, ka dei ban shimkhia ïa ki aiñ kiba la don lypa ban ïada ïa ka Jylla, ym ban shu shna kyrteng thymmai man ka por bym poi shaei-shaei ruh.
“Ngim tip sa hadien lai snem sa kaei ka kyrteng aiñ kaba kin pynmih. Ka Sorkar ka dei ban shimkhia ban pyntreikam ïa ki aiñ kiba la don lypa, ym ban shu pynmih tang ïa ki kyrteng aiñ ki bym treikam ei-ei,” la kyntu u Bah Lambokstarwell.
Ka KSU ka dawa ba ka Sorkar ka dei ban bud pyrkhing ïa ki kyndon kiba la don bad ban pynurlong ïa ka jingthrang u paidbah ban ïoh ïa ka aiñ kaba lah ban ïada shisha ïa ka jaitbynriew, khlem da pynsyrwa kai ïa ka por ha ki jingïakren ki bym shong nongrim.
