Shillong, Lber 01
Ki seng saiñpyrthei bapher bapher hapoh ka jylla mynta u bnai kin sa sdang ban wad kyrtong na bynta ban pynieng ha ka ilekshon shiteng samoi Member of Parliament Lok Sabha na Shillong constituency hadien ka shuki ka la thylli na ka jingkhlad noh u Dr.Ricky AJ Syngkon.
Ki seng sainpyrthei kiba ju pynieng kyrtong ha ka ilekshon MP Lok Sabha kum ka National People Party, ka Voice of the People Party, ka United Democratic Party, ka Indian National Congress, ka Bharat Janata Party, HSPDP kin sa shong jingialang mynta u bnai Lber ban twad jingmut ban jied ia u kyrtong ban sei ynda ka Election Commission ka Ri India ka la pynbna ia ka tarik thep vote.
Ka VPP kaba la duh ia u nongialam u Dr. Ricky Syngkon kan sa shong pyrkhat ban jied bujli ban iakhun ha kane ka ilekshon shiteng samoi.
Ka seng Congress ka bym don MLA shuh kaba la pynieng da u bah Vincent Pala uba la shah rem noh ha u kyrtong ka VPP kin sa shong pyrkhat la kin pynieng biang ia u bah Vincent ne kin bujli noh da uwei.
Ka NPP kaba bat ia ka bor sorkar kaba la pynieng ia ka kong Ampareen Lyngdoh ha ka ilekshon MP ha u 2024 mynta kane ka seng kan sa shim rai la kan pynieng biang ia ka kong Ampareen ne kan jied noh da kiwei.
Kumjuh ruh ka UDP kaba la pynieng ia u bah Robertjune Kharjahrin ha ka ilekshon ba la dep kan sa shong jingialang la kan pynieng kyrtong biang ne kan shu kyrshan ia kano ka seng sainpyrthei.
Katba ka BJP, HSPDP kiba don ha liang sorkar bad ka TMC kaba don ha liang pyrshah ki ba khlem pynieng kyrtong ha ilekshon ba la dep kin sa shong jingialang la kin kyrshan ia kiwei ne kin pynieng kyrtong lang ha kane ka ilekshon shiteng samoi.
