Shillong, Lber 01
U Bah Lambokstarwell Marngar, President ka Khasi Student Union (KSU) u la ong ba kum ki paidbah ngi khmih lynti ba ka jingwanrah ka Sorkar Jylla ïa kaiphod expert committee halor ka bhah thungkam thungjam ban don ka jingkylla hynrei ka neh kumjuh khlem don ka jingkylla.
“Ka seng man ka por ka ju ai jingmut ban pynkylla noh ïa kane ka bhah thungkam thungjam khnang ba kan nym don shuh ka jingnoh shiliang,” la ong u Bah Lambokstarwell haba kren sha ki lad pathai khubor.
U la ong ruh ba hadien ba ka Sorkar ka la shna ïa ka expert committee bad ka seng ka la pyndep ïa la ka jong ka kamram ban ai jingmut, da kaba khmih lynti ban don ka jingkylla hynrei ka neh kumjuh.
“Ngi la ai jingmut sha ka Sorkar ba kan kyntiew noh ïa ka bhah thungkam thungjam jong ngi. Haba ngi peit ïa ka jingïaid jong ka por ka jingbun paid hi ka dei jong ka bri u hynñewtrep baroh kawei. Ka seng kan sa ïai shong pyrkhat halor kane ka kam,” la ong u Bah Lambokstarwell.
Haba kren halor ka expert committee, u Bah Lambokstarwell u ong ba kane kam shym la don ei-ei hynrei ka neh kumjuh kumba long naduh mynshuwa bad ka shu pynsyrwa kai ïa ka por.
Ka seng hi kan sa shong pyrkhat ba kaei ka sienjam ban shim nangne shakhmat ban ai jingmut biang sha ka Sorkar. “Ngi thrang ngi angnud ba ka dei ban don ka jingkylla haba ïadei bad ka bhah thungkam thungjam khnang ba kan nym don shuh ka jingnoh tarajur nangne shakhmat” u la bynrap.
Haba kylli u la ïathuh ba ka seng ka la ai jingmut ba kata ka bhah jong u Garo kam shym la ktah hynrei ngi kwah ban kyntiew noh na ka 40% sha ka 50% sha ki khun ka bri u hynñiewtrep. Ngam tip kiwei ki ai jingmut kumno hynrei ka seng ka ai jingmut kumne, ban pynshong nongrim halor ka jingbun paid.
