Shillong, Lber 01
Ki liengsuiñ ïapom jong ka Israel ki la pynhap haduh 30 tylli ki bom ha ka jaka ba sah u nongïalam ba ha khlieh duh jong ka Iran, u Ayatollah Ali Khamenei, kum shi bynta jong ka jingïatreilang hapdeng ka Israel bad ka America.
Kat kum ka khubor The Wall Street Journal, ki liengsuiñ ïapom jong ka Israel, ki la pynhap haduh 30 tylli ki bom ha katei ka jaka sah u Khamenei , hadien ba la ïoh jingtip ïa ka jaka ba u don.
Ka khubor, ka iathuh ba ki heh syntiat jong ka Israel bad America, ki la ap slem bha ia ka jingialang jong ki nongialam ba ha khlieh duh jong ka sain pyrthei bad shipai jong ka Islamic Republic, na ka bynta ban thombor ia ki ha kajuh ka por.
Ki heh sorkar jong ka Israel, ki la ong ba ki bor wad bniah ha kaba kut ki la ithuh ïa lai tylli ki jingïalang kiba kum kine ha ka sngi Saitjaiñ, bad la tip ruh ïa ka jaka jong u Khamenei ha katei ka por.
Ka Wall Street Journal ka la batai ia katei ka khyllipmat kum ka lad kaba “kyrpang”, kaba la pynlong ia katei ka jinghiar thma ban pynlong ha ka por mynsngi.
Ka khubor ka la kdew shuh shuh ïa ki tyllong khubor jong ka America kiba la ong ba ka Washington ka don ïa ki jingtip kiba pyni ba ka Islamic Republic ka dang pyrkhat ban leh eiei pyrshah ïa ki nongshah thombor jong ka America ha shuwa ba ka hukum ban hiar thma kan mih da u President ka US Donald Trump. Kata ka jingtip, ki tyllong khubor ki la ong, ka la pynlong ban shim rai kyrkieh da u president jong ka US.
Ka US bad ka Israel, ki la pynlong ïa ka jinghiar thma kaba ïatreilang ha Iran, ha ka sngi saitjaiñ, ha kaba ki la thmu ïa ki katto katne ki jaka buh shipai, ki ophis sorkar, bad ki ophis jong ki nongïalam saiñ hima sima ba ha khlieh duh jong ka sorkar, kynthup ïa u nongïalam ba ha khlieh duh jong ka sorkar, u Ali Khamenei, u Myntri ka tnat ïada ri, u Amir Naserzadeh, bad u Commander-in-Chief, u Mo. U Khamenei, uba la 86 snem ka rta, uba la mihkhmat ia ka Iran, naduh u snem 1989, ula iap ha katei ka jingtherbom.
Ka Iran ka la pynthikna ruh ba u nongïalam ba ha khlieh duh u Ali Khamenei u la ïap ha ki jinghiar thma liengsuiñ kiba heh jong ka US bad ka Israel, da kaba pynbna ïa ka jingsngewsih kaba 40 sngi hadien ba ki heh sorkar ki la batai kum ka jinghiar thma kaba jur tam ha ki jaka jong ka Iran ha kine ki phew snem.
Hadien ki jinghiar thma, ka Iran ka la maham ba kan hiar thma ïa ki jaka buh shipai jong ka US ha kylleng ka West Asia kum ka jingkynthoh halor ka jingïatreilang jong ka US bad ka Israel kaba la pynïap ïa u nongïalam ba ha khlieh duh jong ka Ri u Ali Khamenei.
U Donald Trump, ha ka Sngi U Blei, u la pynmih ïa ka jingmaham kaba thymmai pyrshah ïa ka Iran, hadien ka jingkam jong kane ka Iran, ba ka la sdang ban hiar thma ïa ka America bad ka Israel, hadien ka jingïap jong u nongïalam ba ha khlieh duh jong ka Ri Khamenei. U Trump u la ong ba ka ri kan iakynduh ia ka bor kaba ym pat ju don mynno mynno ruh lada jia kano kano ka jingthombor kaba kum kane pyrshah ia ka US bad ka Israel.
