Shillong, Lber 01
Ka jingïaseng jong ki samla kata ka Khasi Jaintia Presbyterian Synod Pdeng bad ka Khasi Jaintia Presbyterian Synod Mihngi ka long kaba shitrhem kaba la pynkut mynta ka sngi u Blei kaba dei ka 1 tarik Lber 2026.
Ha ka jingiaseng ki samla ka KJP Synod mihngi kaba 24 sien ka long ha Balang Presbyterian Mynso, West Jaintia Hills bad ka KJP Synod Pdeng kaba ar sien ka long ha Balang Presbyterian Mawkriah, East Khasi Hills district.
Ha ka jingiaseng kaba arsien ha Mawkriah la sam ka khubor da u pastor HK Nongbsap bad ha Mynso la sam ka khubor da u pastor CS Suchiang.
U pastor HK Nongbsap u la kren shaphang ka por ka jingjia shaphang ka ktien ban khang tala, ka bym plie shuh tad haduh ka por kaba kut.
U pastor u la sam ia ka ktien jong u Blei da kaba pule na ka Kitab u Daniel ka Lynnong kaba 12 bad ka dkhot kaba 9 bad 10, ki ktien kiba ong, ” kiba khuid kin nang khuid, ki bymman kin dang bymman, tang kiba stad kin sngewthuh.
U la iathuh ba kine ki kyntien dei ba la kren da u angel rangbah lyngba ka ktien u Blei ban kren ha u samla uba dangrit, ban ong, “To kren ia u paidlang jong u Blei hynrei la ap da ki phew snem kam don ka jingkyllabamut.
Shuh shuh u la iathuh ba u Blei u la ong ia u angel khie leit sha u shakri ban khang tala, wat plie shuh ia ka tad haduh ka sngi kaba kut.
“U samla u la ong ngam sngewthuh balei phi phah khang tala, hato phim khot shuh ia kine ki briew sha jingkyllabamut” u la ong biang.
Kumta u pastor u la iathuh ba u angel u ong ia u samla koit koit kaba mut sngap noh wat jam shuh shakhmat.
Katba u pastor CS Suchiang u la sam ia ka ktien jong u Blei na ka kitab u nongiathuhlypa eksakial ka Lynnong 22 ka dkhot kaba 30, ki ktien kiba ong, “Nga la wad ia u briew napdeng jong ki u ban pynieng ka jingker bad ban ieng ha jingpra hakhmat jong nga na bynta ka ri ba ngam pynjot ia ka hynrei ngam shem satia.”
Ha ka jingiaseng ha Mynso la pynrhem da ki jingrwai jong ki samla ka Balang Tilka, Umiew, Mynso,Stading Choir KJP Synod Mihngi.
Katba ha Mawkriah la pynrhem da ka jingiaseng samla balang Presbyterian Mawryngkneng, Mawkriah, Standing Choir Mylliem Presbytery, Standing Choir KJP Synod Pdeng.
