Shillong, Lber 01
U Myntri ka Sorkar Pdeng u Dr. Virendra Kumar uba dei khmih ïa ka tnad Social Justice and Empowerment ka ri, u la leit ban jngoh ïa ka Composite Regional Centre for Skill Development, Rehabilitation and Empowerment of Persons with Disabilities (CRCSRE), Shillong ha ka jingwan jong u ha ka jylla Meghalaya.
Kane ka jingleit jngoh u Myntri ka Sorkar Pdeng ka long ban peit bniah ïa ki kam ba dang ïaid shakhmat jong ka Centre bad ïakren ïa kiba ki ïoh jingmyntoi, ki kmie ki kpa bad ki nongtrei.
U Dr. Virendra u la pynpaw ka jingsngewhun halor ka jingïaid shaphrang ka jingshakri ha ka liang ka jingsumar, ka jingai jinghikai ban kyntiew ïa ki sap, ki tiar ai jingïarap bad ka jingkyrshan ha ka pule puthi ïa ki briew kiba don jingduna ha ki dkhot met jong ka Jylla.
Haba ai jingkren ha ka jingïalang, u Dr. Virendra u la ong ba ynda la pyndep ïa ki jingdonkam haba ïadei ka jaka, ki jingdon jingem, yn sa sdang ïa ka jingtei bad jingpynheh ïa ka CRC campus kaba pura, ryngkat ki tiar kiba katkum ka juk mynta, ki jaka ai jinghikai kiba la pynbha ban pynkhlaiñ ïa ki jingshakri.
U la ban jur ba ki CRC ha kylleng ka ri, ryngkat ki National Institute kiba don hapoh ka tnad Empowerment of Persons with Disabilities, ki trei shitom ban ai ka jingsumar, ka jingai jinghikai ban ïoh kam bad ki lad ai jingsumar ïa ki briew kiba don jing duna ha ki dkhot met.
U la pynkynmaw ïa ka jingkut jingmut jong ka Sorkar India na ka bynta ka roi ka par kaba kynthup ïa baroh bad ban jur ba ka jingpynkupbor ïa ki briew kiba don jingduna ha ki dkhot met ka long ka mat ba kongsan hapoh ka jingthmu jong ka “SabkaSaath, SabkaVikas, SabkaVishwas.”
U la ong ba ki ‘scholarship’ ki sienjam ban kyntiew ïa ki sap, ka jingsam ïa ki tiar jingïarap bad ki skhim ban kyntiew ïa ka kamai kajih ka plie lad ïa ki briew kiba don jingduna ha ki dkhot met ban ïoh ia ka jinglah ban shaniah halade.
U Dr. Virendra u la sam ïa ki tiar jingïarap sha ki nongïoh jingmyntoi, kynthup ïa ki tiar ai jinghikai, ki shuki cerebral palsy bad ki kor suh jaiñ ban kyntiew ïa ka jingtreikam lajong bad ka jinglong laitluid ha ka jingim.
La ïoh ïa ka jingbatai kaba bniah da Dr. Ram Shakal Sahani ïa ki kam bad ki jingjop jong ki Centre ha ryngkat ki jingïathuh lyngkot shaphang prokram ai jingtip jong ka Centre bad ki jingpynkhreh kam na ka bynta ki por ban wan.
Ka Topa Dey, ka samla pule kaba la pynrung kyrteng ha ka prokram jong ka Centre kaba ïoh jinghikai ban ïoh kam, ka la ai khublei ïa u Myntri bad ki nonghikai kiba la sdang ïa ki jingai jinghikai na ka bynta ki eksamin ban ioh kam.
Ka la ïathuh ba ka la pyndep ïa ka eksamin ba nyngkong na ka bynta ka SBI bad ka dang ïoh ïa ka stipend man la u bnai kum ka jingkyrshan pisa bad ka la pynshlur ïa ki para samla pule ban shimkhia ïa ka ïa ki jingpule na ka bynta ka lawei kaba bha.
Ïa u Myntri la pdiang sngewbha da u Dr. P. P. Mohanty, Director, Swami Vivekanand National Institute of Rehabilitation Training and Research (SVNIRTAR), Cuttack, Odisha bad u Dr. Ram Shakal Sahani, Director, CRCSRE Shillong.
